Լոռու մարզպետի աշխատակազմ

 Այսօր համայնքապետարանի նիստերի դահլիճում անցկացվեց համայնքի ավագանու հերթական նիստը, որին ներկա գտնվեց նաև մարզպետ Անդրեյ Ղուկասյանը: Նիստի ընթացքում Վանաձոր համայնքի ղեկավար Մամիկոն Ասլանյանը հանդես եկավ Վանաձոր համայնքի 2018 թվականի բյուջեի կատարման տարեկան և հաշվետու տարում 2018-2021թթ․ զարգացման ծրագրի իրականացման վերաբերյալ 2018 թվականի հաշվետվությամբ:
Մամիկոն Ասլանյանի կարճ ներածական ելույթից հետո, որում ներկայացվեցին ոչ միայն նախորդ տարվա ձեռքբերումներն, այև այն խոչընդոտները, որոնք թույլ չեն տվել ավելի մեծ արդյունքներ գրանցել որոշ ուղղություններով: Համայնքի ղեկավարի ընդհանրական հաշվետվությունը ներկայացվեց տեսանյութով և ֆինանսական վերլուծությամբ:
Հաշվետվության ավարտին մարզպետը հանդես եկավ մի շարք նկատառումներով: Նա կարևորեց Վանաձորի համայնքապետարանի արդյունավետ գործունեությունը՝ նշելով, որ ամենափոքր թերացումներն անգամ լուրջ ազդեցություն են ունենում մարզի ընդհանուր ցուցանիշերի վրա: Ա. Ղուկասյանը կարևորեց քաղաքապետարանի գործունեության թափանցիկությունը և հաշվետվողականությունը և ի լրումն առաջարկեց բյուջեի ծախսային մասը հանրությանը ներկայացնել առավել բացված տարբերակով և հանգամանորեն:
Խոսելով նախորդ տարի Վանաձորում իրականացված ասֆալտապատման աշխատանքներից՝ նշեց, որ այսուհետ ևս դրանք խստագույնս վերահսկվելու են, և անորակությունը պարզապես չի ընդունվելու: Առհասարակ խիստ վերահսկողություն պետք է սահմանվի ցանկացած շինաշխատանքի նկատմամբ:
-Այս մոտեցումը կհանգեցնի նրան, որ ընկերությունները, որոնք ցանկություն կունենան մասնակցելու այս կամ այն շինարարական մրցույթին, հաշվի կառնեն իրենց հնարավորությունները և առկա ռիսկերը,-ասաց Ա. Ղուկասյանը:
Մարզպետն իր խոսքում ողջունելի համարեց այն, որ Վանաձորը ներկայացրել է սուբվենցիոն 7 ծրագիր: Նա հույս հայտնեց, որ դրանք կհաստատվեն և կիրականացվեն արդյունավետ՝ ի նպաստ Վանաձորի բնակչության:
Մարիզ ղեկավարն իր խոսքում նաև նշեց, որ հետհեղափոխական շրջանում դեռևս ահռելի աշխատանք պետք է իրականացվի ինչպես մարզային, այնպես էլ՝ քաղաքային ենթակայության հիմնարկներում: Այս առումով նա անդրադարձավ նաև ուռճացված հաստիքացուցակների խնդրին.
-Մեր նպատակը մարդկանց ոչ թե գործազուրկ դարձնելն է, այլ՝ աշխատանքի արդյունավետ կազմակերպումը,-ասաց նա:
Հարկերի հավաքագրմանն ադրադառնալով՝ Ա. Ղուկասյանը նշեց, որ արտոնյալ կարգավիճակ ունեցող հարկատուներ մարզում չեն կարող լինել և տարբերակված մոտեցում ցուցաբերելը, մեղմ ասած, անընդունելի երևույթ է:
Մարզպետն անդրադարձավ մի շարք այլ խնդիրների ևս:
Վերջում նա կոչ արեց մարտի 23-ին ակտիվորեն ներգրավվել համապետական շաբաթօրյակի աշխատանքներում: