Լոռու մարզպետի աշխատակազմ

 Մարզում հետհեղափոխական շրջանում ծնունդ առած ներդրումային ծրագրերը մարզպետ Անդրեյ Ղուկասյանն անձամբ է խրախուսում: Դրանք, մարզի ղեկավարի նախաձեռնությամբ, որպես հաջողության պատմություններ, կներկայացվեն հանրությանը՝ խթան և ոգևորիչ ուժ հանդիսանալով շատերի համար:
Այսօր մարզպետն այցելեց Հոլանդիայից հայրենիք վերադարձած ու Լոռիում հաստատված Պայքար Քեշիշյանին, ով արդեն 7-8 ամիս է՝ անասնաֆերմա է հիմնել ու հաստատվել Ստեփանավանում: Շուրջ 1000 գլուխ կով, ոչխար և խոզ է պահվում այստեղ: Սեզոնին աշխատանքով ապահովվում է 60-70 մարդ: Առաջիկայում գործարարը նախատեսում է անասնագլխաքանակը կրկնապատկել ու անգամ եռապատկել, նոր գոմեր կառուցել: Գործարարը մարզի ղեկավարին օրեր առաջ դիմել էր ավելի քան 150 հա վարելահող իրեն հատկացնելու հարցով, որպեսզի կարողանա անասնակերի խնդիրը լուծել: Մարզի ղեկավարը ոչ միայն պատրաստակամություն է հայտնել աջակցելու, այլև անձամբ է այցելել՝ գործարարին խրախուսելու.
«Պայքարն ասում է, որ երեք տարի մտածելուց հետո Հայաստան վերադառնալու վերջնական որոշումը կայացրել է հեղափոխությունից հետո։ Ուրախ եմ, որ նա ընտրել է հենց Լոռին։ Լոռիում բոլոր ներդրողների համար ապահովելու ենք լավագույն պայմանները ապրելու ու աշխատելու համար»,-ասում է Ա. Ղուկասյանը։