Լոռու մարզպետի աշխատակազմ

 Այսօր Լոռու մարզպետարանի դահլիճում տեղի ունեցավ Հաշմանդամություն ունեցող անձանց հարցերով զբաղվող մարզային հանձնաժողովի այս տարվա առաջին նիստը, որը վարում էր Լոռու մարզպետ, հանձնաժողովի նախագահ Անդրեյ Ղուկասյանը:
Օրակարգի առաջին հարցով մարզպետարանի առողջապահության և սոցիալական ապահովության վարչության սոցիալական ապահովության բաժնի պետ, հանձնաժողովի քարտուղար Վալերի Ջաղինյանը ներկայացրեց հաշմանդամություն ունեցող անձանց շրջանում 2018թ. ընթացքում կատարված աշխատանքների մասին տեղեկատվություն՝ մասնավորապես անդրադառնալով տարվա ընթացքում մարզպետարանի և մարզի հասարակական կազմակերպությունների կողմից իրականացված ծրագրերին, անցկացված միջոցառումներին, հանրային նշանակության վայրերը մատչելի դարձնելու ուղղությամբ կատարված աշխատանքներին, ուսուցման ծրագրերին և այլն:
Մարզի զբաղվածության տարածքային կենտրոն¬ների կողմից հաշմանդամություն ունեցող անձանց ներգրավվածությամբ իրակա¬նացված աշխատանքներին և գործատուների հետ համագործակցությանն անդրադարձավ ՀՀ աշխատանքի և սոցիալական հարցերի նախարա¬րության աշխատակազմի «ՀՀ զբաղվածության գործակալության» Վանաձորի տարածքային կենտրոնի տնօրեն Արա Առաքելյանը: Նա մասնավորապես նշեց, որ 2018թ.-ին կենտրոնի կողմից իրականացվել է շուրջ 10 տարաբնույթ ծրագիր, որոնց արդյունքում աշխատանքի տեղավորվածների 12 տոկոսը հաշմանդամություն ունեցող անձինք են եղել:
«Սոցիալական աջակցության մասին» ՀՀ օրենքի և ՀՀ կառավարության 10.09.2015թ. «Միջգերատեսչական սոցիալական համագործակցության կանոնակարգը սահմա¬նելու մասին» թիվ 1044-Ն որոշման պահանջների և սոցիալական համագործակցու¬թյան իրականացման աշխատանքները համակարգելու նպատակով Լոռու մարզի տարածաշրջանային համակարգող խորհուրդների կազմի վերանայման անհրաժեշտության հարցի վերաբերյալ զեկուցեց Վալերի Ջաղինյան: Մարզպետը հարցի հետ կապված նշեց, որ այդ խորհուրդները չեն կարող ձևական բնույթ կրել և լրջորեն պետք է զբաղվեն սահմանված գործառույթներով:
«Հավասար իրավունքներ, հավասար հնարավորություններ» հկ նախագահ Անուշ Ասլանյանն իր հերթին տեղեկատվություն ներկայացրեց Վանաձոր քաղաքի հանրային նշանակություն ունեցող 15 պետական կառույցում կազմակերպության կողմից իրականացված ֆիզիկական մատչելիության և մատուցվող ծառայությունների հասանելիության մոնիթորինգի արդյունքների վերաբերյալ՝ նշելով, որ արդյունքները հիմնականում գոհացուցիչ չեն եղել: Մասնավորապես նշեց, որ հաստատությունների 67 տոկոսը հիմնական մուտքի մոտ չի ունեցել թեքահարթակ, մինչդեռ շինության ներս մուտք գործելու համար 65 տոկոսի մոտ առկա է եղել թեքահարթակ, շինություններից 80 տոկոսում ներսի հատվածը բավականաչափ հարմար է եղել հաշմանդամության սայլակ օգտագործողների տեղաշարժվելու համար և այլն: Հարցումներ են իրականացվել նաև 200 հաշմանդամների շրջանում: Հարցվածների 67 տոկոսն այցելել է պետական կառույցներ, իսկ նրանցից 69 տոկոսը հանդիպել է ֆիզիկական մատչելությանն առնչվող խոչընդոտների: Ա. Ասլանյանը նշված խնդիրների հետ կապված հանդես եկավ նաև մի շարք առաջարկություններով, որոնք ընդունվեցին ի գիտություն:
Ինչպես նշվեց, կազմակերպությունը լրջորեն զբաղվում է նաև հաշմանդամային սպորտի զարգացմամբ և այժմ ձեռնամուխ է եղել Վանաձորում նստած վոլեյբոլի թիմի համալրման աշխատանքներին: Նախատեսում են նաև ապագայում ունենալ բասկետբոլի թիմ ևս, ինչն առայժմ հնարավոր չէ իրականացնել, քանի որ պայմանավորված է մեծ ծախսերով: Մարզի ղեկավարը, ողջունելով կատարված աշխատանքները, խոստացավ հնարավորության սահմաններում աջակցել իրականացվող ծրագրերին:
Ա. Ասլանյանը տեղեկացրեց նաև, որ մարտի 5, 6, և 7-ին քաղաքի երկու բանուկ հատվածներում նախատեսում են կազմակերպել կազմակերպության անդամների ձեռքի աշխատանքների ցուցահանդես-վաճառք:
Ամփոփելով նիստը՝ Ա. Ղուկասյանը նշեց, որ, չնայած տարվող աշխատանքներին, դեռ զգալի անելիքներ կան բարձրացված խնդիրներին հիմնավոր լուծումներ տալու համար: Նա մարզպետարանի համապատասխան պաշտոնյաներին հանձնարարեց շրջաբերական գրություններով դիմել մարզային ենթակայության կազմակերպություններին, տնտեսված միջոցների հաշվին տարածքների մատչելության կազմակերպման ուղղությամբ աշխատանքներ իրականացնելու հանձնարարականով: