Տեղեկատվական կենտրոն
Նորություններ
Անցած շաբաթվա գլխավոր իրադարձությունը «Իմ քայլը հանուն Լոռու մարզի բիզնես ֆորումն» էր, որը բարձր գնահատականի արժանացավ անձամբ ՀՀ վարչապետ Նիկոլ Փաշինյանի կողմից. միջոցառման արդյունավետությու
25.02.2019
Փետրվարի 25-ին Լոռու մարզպետ Անդրեյ Ղուկասյանն անցկացրեց հերթական աշխատանքային խորհրդակցությունը մարզպետարանի կառուցվածքային ստորաբաժանումների ղեկավարների, պատասխանատու այլ պաշտոնյաների մասնակցությամբ:
Մինչ օրակարգային հարցերին անդրադառնալը, մարզի ղեկավարը շնորհակալություն հայտնց նախկին փոխմարզպետ Սերգեյ Սարուխանյանին համատեղ աշխատանքի համար և նշեց, որ բարձր է գնահատում նրա աշխատանքային և մարդկային որակները՝ վստահություն հայտնելով, որ Ս. Սարուխանյանն անպայման իր ներուժն ու կարողությունները հանուն հայրենիքի կծառայեցնի այլ ոլորտներում:
Ս. Սարուխանյանն իր հերթին շնորհակալություն հայտնեց մարզի ղեկավարին համատեղ կառուցողական աշխատանքի համար: Նա իր երախտագիտությունը հայտնեց նաև մարզպետարանի աշխատակազմին այս ամիսներին համատեղ աշխատանքի համար և նշեց, որ կապը երբևէ չի կորցնելու այս կառույցի հետ:
Անցած շաբաթվա գլխավոր իրադարձությունը, փետրվարի 23-ին Վանաձորի տեխնոլոգիական կենտրոնում անցկացված «Իմ քայլը հանուն Լոռու մարզի բիզնես ֆորումն» էր՝ աննախադեպ մի միջոցառում, որը բարձր գնահատականի արժանացավ անձամբ ՀՀ վարչապետ Նիկոլ Փաշինյանի կողմից: Շնորհակալություն հայտնելով ֆորումի կազմակերպական աշխատանքներում ներգրավված բոլոր անձանց՝ մարզի ղեկավարը նշեց, որ մասշատաբային և տպավորիչ միջոցառում լինելուց զատ՝ կարևորվում է նաև արդյունավետությունը: Իսկ առաջին լուրջ արձագանքներն արդեն իսկ կան: Նա հայտնեց, որ հենց տեղում բազմաթիվ համագործակցության պայմանավորվածություններ են ձեռք բերվել:
-Մարզպետարանը կհետևի գործողությունների ընթացքին, հետագա զարգացումներին և կտեղեկացնի հանրությանը: Ակնկալում ենք աննախադեպ արդյունքներ,-ասաց Ա. Ղուկասյանը:
Մեկ այլ՝ մարզի համար մեծ կարևորության միջոցառման՝ Հովհաննես Թումանյանի 150-ամյա տարեդարձը Դսեղում մեծ հանդիսավորությամբ կազմակերպելու և անցկացնելու համար մարզպետը իր երախտագիտությունը հայտնեց նաև կրթության, մշակույթի և սպորտի վարչությանը, մշակույթի բաժնին:
Փոխմարզպետ Արշակ Հովսեփյանը, գլխավոր քարտուղարի պաշտոնակատար Վալերի Խաչատրյանը, ստորաբաժանումների ղեկավարները ներկայացրեցին նախորդ շաբաթվա ընթացքում կատարված աշխատանքները, զեկուցեցին մարզի ղեկավարի և տարբեր գերատեսչություններից ստացված հանձնարարականների ընթացքի մասին:
Ֆինանսական և սոցիալ-տնտեսական զարգացման վարչության հաշվապահական հաշվառման բաժնի պետ Արտավազդ Բեջանյանը տեղեկացրեց, որ փետրվարի 22-ի դրությամբ սեփական եկամուտների հավաքագրումը պլանի դիմաց կազմել է 65,9 տոկոս: Ըստ նրա, կան թերացող համայնքներ, որոնց հետ աշխատանքներ են տարվում: Նա ներկայացրեց նաև մարզի առողջապահական կազմակերպությունների ֆինանսատնտեսական գործունեության ամփոփ արդյունքները՝ 2017 և 2018թ.թ. համեմատական ցուցանիշերը՝ մասնավորապես նշելով, որ 2017թ. և 2018թ. բոլոր հիմնարկներն աշխատել են շահույթով, 2018թ. պետական բյուջե է փոխանցվել 2413.5 հազար դրամ շահութաբաժին:
Հողաշինության և հողօգտագործման բաժնի պետ Արտակ Օհանյանը զեկուցեց, որ մարզում գործող բենզալցակայանների տարածքում սանհանգույցների առկայությանն ու դրանք ՀՀ օրենսդրության պահանջներին համապատասխանեցնելու ուղղությամբ տեղաշարժ է նկատվում: Վարչական վարույթ կհարուցվի այն տնտեսվարողների նկատմամբ, որոնք մինչև մարտի 1-ը որևէ քայլ ձեռնարկած չեն լինի:
Գյուղատնտեսության և բնապահպանության վարչության գյուղատնտեսության բաժնի պետ Արտյոմ Շահվերդյանը մարզի անասնաբույժների հետ համայնքների կողմից պայմանագրերի կնքման հանձնարարականի վերաբերյալ հայտնեց, որ մարզի բոլոր համայնքներն արդեն կնքել են պայմանագրեր: Նրա տեղեկացմամբ, մարզում իրականացվում է նաև պետական աջակցությամբ մատչելի գներով մարզի գյուղատնտեսներին տրվող պարարտանյութի և սերմացուի բաշխման գործընթացը:
Քննարկվեցին նաև այլ հարցեր, տրվեցին հանձնարարականներ: