Լոռու մարզպետի աշխատակազմ

Այսօր Լոռու մարզպետ Անդրեյ Ղուկասյանն անցկացրեց հերթական աշխատանքային խորհրդակցությունը, որին ներկա էին մարզպետի տեղակալներ Արամ Խաչատրյանը, Սերգեյ Սարուխանյանը, Արշակ Հովսեփյանը, մարզպետարանի կառուցվածքային ստորաբաժանումների ղեկավարները, այլ պատասխանատու պաշտոնյաներ:

Մինչ օրակարգային հարցերին անցնելը, Ա. Ղուկասյանը շնորհավորեց ներկաներին  ԱԺ արտահերթ խորհրդարանական ընտրություններում ազատ կամարտահայտման հնարավորության համար: Նա նաև ներկայացրեց մարզպետարանի առողջապահության և սոցիալական ապահովության վարչության նորնշանակ ժամանակավոր պաշտոնակատար Արթուր Մխիթարյանին՝ մաղթելով աշխատանքային հաջողություններ: 

Փոխմարզպետները և ստորաբաժանումների ղեկավարները հանդես եկան շաբաթվա ընթացքում կատարված աշխատանքների վերաբերյալ համառոտ հաշվետվություններով՝ մասնավորապես անդրադառնալով տարբեր գերատեսչություններից և մարզի ղեկավարի կողմից տրված հանձնարարականների կատարմանը: Անդրադարձ կատարվեց նաև ընթացիկ խնդիրներին: Վերջիններիս հետ կապված՝ մարզպետը հանդես եկավ հստակ ցուցումներով:
Մարզպետարանի գլխավոր քարտուղարի տեղակալ Վալերի Խաչատրյանը ներկայացրեց ստորաբաժանումների ընթացիկ աշխատանքները՝ նշելով, որ բոլոր հանձնարարականները կատարվել են ժամկետների մեջ: 
Ֆինանսական և սոցիալ-տնտեսական զարգացման վարչության հաշվապահական հաշվառման բաժնի պետ Արտավազդ Բեջանյանի ներկայացմամբ, դեկտեմբերի 6-ի դրությամբ եկամուտների հավաքագրումը պլանի դիմաց կազմել է ընդամենը 12 տոկոս: Այսուհանդերձ նա նշեց, որ այս օրերին հավաքագարման տեմպերն ակտիվացել են, և հույս հայտնեց, որ մարզն իր պլանը կկատարի շուրջ 95 տոկոսով:

Զարգացման ծրագրերի, զբոսաշրջության և վերլուծության բաժնի գլխավոր մասնագետ Անի Բաղդասարյանը հայտնեց, որ նախորդ շաբաթ շարունակվել են բիզնես-ֆորումին ներկայացվելիք ծրագրերի քննարկման աշխատանքները և նշեց, որ առաջարկված ծրագրերից ընտրվել են 4-ը: Նա նաև տեղեկացրեց, որ նախորդ շաբաթ համագործակցության պայմանավորվածություններ են ձեռք բերվել 2 միջազգային կազմակերպությունների հետ, որոնք ցանկություն են հայտնել ծրագրեր իրականացնել մարզում:

Գյուղատնտեսության և բնապահպանության վարչության գյուղատնտեսության բաժնի պետ Արտյոմ Շահվերդյանը ևս տեղեկացրեց, որ մարզում անասնապահության ոլորտում ներդրում իրականացնել ցանկացող մեկ միջազգային կառույցի հետ շրջայց է կատարվել մարզի տարածքում, ուսումնասիրվել են կաթի վերամշակման արտադրամասերը, մարզի հնարավորությունները:

Մարզպետը կարևորեց մարզում ներդրում իրականացնել ցանկացող բոլոր ընկերությունների հետ ակտիվ համագործակցելու և աջակցելու անհրաժեշտությունը:

Քննարկվեցին նաև այլ հարցեր, տրվեցին հանձնարարականներ: