Լոռու մարզպետի աշխատակազմ

Այսօր Լոռու մարզպետարանում հրավիրվել էր Հաշմանդամություն ունեցող անձանց հարցերով զբաղվող Լոռու մարզային հանձնաժողովի նիստը, որը վարում էր մարզպետարանի առողջապահության և սոցիալական-ապահովության վարչության սոցիալական ապահովության բաժնի պետ, հանձնաժողովի քարտուղար Վալերի Ջաղինյանը: Նիստին մասնակցում էր նաև Լոռու մարզպետ Անդրեյ Ղուկասյանը:

Վ. Ջաղինայնը հանձնաժողովի անդամների ուշադրությանը ներկայացրեց ՀՀ կառավարության 2018թ. սեպտեմբերի 27-ի «Հաշմանդամություն ունեցող անձանց սոցիալական ներառման 2019թ. տարեկան ծրագիրը և միջոցառումների ցանկը հաստատելու մասին» թիվ 1025-Լ որոշմումը, որը հանգամանորեն քննարկվեց հանձնաժողովի անդամների հետ:

  Մարզի զբաղվածության տարածքային կենտրոն­ների կողմից հաշմանդամություն ունեցող անձանց ներգրավվածությամբ իրակա­նացված աշխատանքների և գործատուների հետ համագործակցության մասին  տեղեկատվություն ներկայացրեց ՀՀ աշխատանքի և սոցիալական հարցերի նախարա­րության աշխատակազմի «ՀՀ զբաղվածության գործակալության» Վանաձորի կենտրոնի տնօրեն Արա Առաքելյանը: Նա մասնավորապես անդրադարձավ  սեպտեմբերի 27-ին անցկացված աշխատանքի տոնավաճառի արդյունքներին՝ նշելով, որ ներկայացված 343 թափուր աշխատատեղերից արդեն լրացվել են 94-ը, ինչը չափազանց դրական արդյունք է:

2018թ. օգոստոսին Ծաղկաձորում անցկացված ՀՀ Նա­խա­գահի մրցանակի համար «Լավագույն հաշմանդամ մարզիկ» հանրապետական մրցույթում Լոռու մարզի հավաքականի հաղթական մասնակցության մասին տեղեկատվությունը ներկայացրեց Կրթության, մշակույթի և սպորտի վարչության մշակույթի և սպորտի բաժնի պետ Արամ Ռևազյանը: Մարզպետը շնորհավորեց թիմին հաղթանակի կապակցությամբ՝ մաղթելով հաջողություններ նաև առաջիկա մրցաշարերում:

Հանդիպման ընթացքում քննարկում ծավալվեց շենք-շինությունները և հանրային տրասպորտը հաշմանդամների համար հարմարավետ դարձնելու խնդրի շուրջ: Հանձնաժողովի անդամ, մարզպետարանի քաղաքաշինության վարչության պետ Արմեն Ջանազյանը պարզաբանեց, որ նոր կառուցվող բոլոր հանրային շինությունները հարմարեցվում են հենաշարժողական խնդիրների ունեցող անձանց համար: Ինչ վերաբերում է տրանսպորտին, ապա նշեց, որ կառավարության մոտեցումն այն է, որ հանրապետությունում լինի մեկ միասնական օպերատոր: Մարզպետն իր հերթին հանձնաժողովի անդամներին առաջարկեց նոր կառուցվող հանրային նշանակության շինություններում հաշմանդամների տեղաշարժման հետ կապված խնդիրներ նկատելու դեպքում անմիջապես դիմել մարզպետարան:

Կատարված աշխատանքների մասին տեղեկատվություն ներկայացրեցին հանձնաժողովի անդամ հանդիսացող «Հավասար իրավունքներ, հավասար հնարավորություններ» ՀԿ-ն, «Լիարժեք կյանք» ՀԿ-ի Ստեփանավանի մասնաճյուղը, «Առաքելություն Հայաստան» բարեգործական ՀԿ-ի Վանաձորի համայնքային կենտրոնը:

Վ. Ջաղինյանը տեղեկացրեց, որ 2018թ. նոյեմբերի 15-ից մինչև դեկտեմբերի 15-ը հաշմանդամության հիմնահարցերին նվիրված միամսյակ կհայտարարվի, իսկ 2018թ. դեկտեմբերին կանցկացվի գլխավոր միջոցառումը և պարգևատրություն: