Լոռու մարզպետի աշխատակազմ

2018թ Վանաձորում կրթական ոլորտում իրականացվող շինարարական աշխատանքների ընթացքին ծանոթանալու նպատակով Լոռու մարզպետ Հրանտ Մարգարյանն աշխատանքային շրջայց կատարեց Վանաձորի թիվ 7 հիմնական դպրոցի նորակառույց շինհրապարակում, թիվ 11 մանկապարտեզի մասնաշենքերում, Միքայել Թավրիզյանի անվան արվեստի պետական քոլեջում և ճանաչողական այցով եղավ Հայաստանի ազգային ագրարային համալսարանի Վանաձորի մասնաճյուղում: Մարզի ղեկավարին ուղեկցում էին փոխմարզպետ Սերգեյ Սարուխանյանը, կրթական ծրագրերի համակարգող Դավիթ Հակոբյանը և մարզպետարանի աշխատակազմի քաղաքաշինության վարչության ճարտարապետական բաժնի պետ Ալեքսանդր Հարությունյանը:
Վանաձորի թիվ 7 հիմնական դպրոցը նոր կառուցվող 450 աշակերտ տեղով երկհարկանի համալիր է՝ բաղկացած 3 մասնաշենքերից, 5x5 մ կաթսայատնից և 2 բաց խաղադաշտերից:
Պատվիրատուն Հայաստանի տարածքային զարգացման հիմնադրամն է/ՀՏԶՀ/, նախագծային կազմակերպությունը՝ «Հայնախագիծ» ՓԲԸ, հեղինակ՝ Ստեփան Լազարյան: Պայմանագրային ընդհանուր արժեքը կազմում է 798.0 մլն.դրամ: Շինության ընդհանուր մակերեսը 3974.0 քառ. մետր է, հողամասի մակերեսը՝ 7326.7քառ. մետր: Գլխավոր կապալառուն հանդիսանում է «Արփա-Սևան» ԲԲԸ: Շինարարը մարզի ղեկավարին նաև տեղեկացրեց, որ աշխատանքների մեկնարկը տրվել է 2017 թվականի ապրիլին և նախատեսվում է շահագործման հանձնել 2019 թվականի մարտին: Սկսված են ներքին հարդարման աշխատանքները: Ծրագիրն ընթացքի մեջ է:
Դպրոցի տնօրենը Հրանտ Մարգարյանին փոխանցեց իր մտահոգությունը՝ կապված վերգետնյա անցում կառուցելու և դպրոցի տարածքում գտնվող քարաշեն էլեկտրակայանը աշակերտների համար առավելագույնս անվտանգ դարձնելու և մեկուսացնելու հետ:
Հաջորդ կանգառը Վանաձորի թիվ 11 մանկապարտեզն էր, որտեղ 2017 թվականի նոյեմբերից մեկնարկած հիմնանորոգման աշխատանքները նախատեսվում է ավարտին հասցնել 2018 թվականի դեկտեմբերին: Պատվիրատուն Հայաստանի տարածքային զարգացման հիմնադրամն է /ՀՏԶՀ/, ծրագրային արժեքը՝ 158.4մլն.դրամ: Գլխավոր կապալառուն հանդիսանում է «Բազալտշին» ՍՊԸ-ն: 2017թ. իրականացվել են 47.3 մլն.դրամի շինարարական աշխատանքներ: 2018թ.-ի համար կծախսվի մնացյալ 111.1 մլն.դրամ գումարը:
Վանաձորի Միքայել Թավրիզյանի անվան արվեստի պետական քոլեջը քառահարկ մասնաշենք է, ունի մարզադահլիճ և հանդիսությունների դահլիճ:
Պատվիրատուն ՀՀ ԿԱ քաղաքաշինության պետական կոմիտեն է, նախագծային կազմակերպությունը՝ «Քվէ նախագիծ» ՍՊԸ-ն: Նախահաշվային արժեքը 930.0 մլն.դրամ է, շինարարությունը մեկնարկել է 2017թ.-ին: 2017-ին իրականացվել են 40 միլիոն դրամի շինաշխատանքներ, այս տարի նախատեսված է ծախսել ևս 100.0մլն.դրամ: Քոլեջի տնօրեն Արմինե Ասլանյանը հատուկ կարևորեց այն աշխատանքները, որ իրականացվում են հաստատությունում: Նա նշեց, որ արվեստի այս կենտրոնը ներկայանալի տեսքի բերելուց հետո կարելի է ակնկալել նաև ուսանողների ներհոսք, իսկ միջոցառումներն ու մարզումները կկազմակերպվեն բարձր մակարդակով:
Հայաստանի ազգային ագրարային համալսարանի Վանաձորի մասնաճյուղի տնօրեն Ալեքսանդր Հակոբյանը հագեցած էքսկուրս կազմակերպեց հյուրերի համար՝ ներկայացնելով վերջին տարիների գրեթե բոլոր ձեռքբերումները, մասնաճյուղի բյուջեով գնված ուսումնական գույքը, գյուղատնտեսական և լաբորատոր բացառիկ սարքավորումներն ու գերժամանակակից համակարգով վերազինված կաբինետները: Համալսարանին կից գտնվող կիսաքանդ մասնաշենքը տնօրենի խոսքով կարող էր հիանալի հնարավորություններ ստեղծել ինչպես կրթական որակը բարձրացնելու, այնպես էլ ուսանողների ներհոսք ապահովելու և բարձրակարգ մասնագետներին հանրապետության այլ քաղաքներից հրավիրելու առումով: Նոր լաբորատորիաները, հանրակացարանը և հյուրերի համար նախատեսվող սենյակները կարող են նպաստել այդ գաղափարի կայացմանը: Մարզպետն առաջարկեց մասնաշենքի շինարարական աշխատանքերի նախահաշիվը ներկայացնել գրավոր: