Լոռու մարզպետի աշխատակազմ

Այսօր Լոռու մարզպետարանում կայացավ աշխատանքային քննարկում Արջուտ համայնքի վարչական տարածքում գտնվող աղբավայրի ներկա և հետագա ճակատագրի շուրջ: Խորհրդակցությանը ներկա էին Լոռու մարզպետ Հրանտ Մարգարյանը, փոխմարզպետ Սերգեյ Սարուխանյանը, հողաշինության եւ հողօգտագործման բաժնի պետ Արտակ Օհանյանը, Արջուտ համայնքի ղեկավար Վարդան Մկրտչյանը, Վանաձորի քաղաքապետարանի կոմունալ տնտեսության, բարեկարգման և շրջակա միջավայրի պահպանության բաժնի պետ Կարեն Պառավյանը, «Սանմաքրում» ՍՊԸ-ի տնօրեն Էդմոնդ Էդարյանը:
Աղբավայրը պարսպով մեկուսացված չէ շրջակա միջավայրից, լուծված չէ ջրահեռացման հարցը: Ռեկուլտիվացիոն աշխատանքներ եւս չեն կատարվում, որի պատճառով աղբը քամու օգնությամբ տարածվում է աղբավայրի հարեւանությամբ գտնվող վարելահողերի վրա: Արջուտի մոտ 20 հա վարելահողեր գյուղացիները աղտոտվածության պատճառով օգտագործում են որպես խոտհարք:
Վանաձորից աղբը աղբավայր է տեղափոխվում նաեւ բաց ավտոմեքենաներով: Համայնքի ղեկավարի պնդմամբ մեքենաներից աղբը թափվում է ինչպես Վանաձոր-Արջուտ, այնպես էլ աղբավայր տանող գյուղամիջյան ճանապարհներին: Աղբավայրը գյուղի էկոլոգիական վիճակի վրա լուրջ հետեւանք է թողնում: Դրա առկայությունը հնարավորություն չի տալիս Արջուտում ծրագրեր իրականացնել: Մոտ 6.5 հա տարածքը մեկուսացնելու համար անհրաժեշտ է ցանկապատել շուրջ 1000 գծամետր տարածք: Անհրաժեշտ է մոտ 1900 մետր գյուղամիջյան ճանապարհի ասֆալտապատում և նույնքան էլ դեպի աղբավայր տանող հատվածի հարթեցում և խճապատում: Մարզի ղեկավարը խնդիրը պատրաստվում է ներկայացնել ՀՀ տարածքային կառավարման և զարգացման նախարարություն: