Տեղեկատվական կենտրոն
Նորություններ
Հիմնանորոգման խնդիրներից մինչև կրթական ծրագրերի, չափորոշիչների, դասագրքերի վերանայման անհրաժեշտություն. մարզպետը հանդիպեց Վանաձորի դպրոցների տնօրենների հետ
08.08.2018
Այսօր Լոռու մարզպետ Հրանտ Մարգարյանը խորհրդակցություն անցկացրեց Վանաձորի դպրոցների տնօրենների մասնակցությամբ: Քննարկմանը ներկա էին նաև մարզպետի տեղակալ Սերգեյ Սարուխանյանը, մարզպետարանի աշխատակազմի գլխավոր քարտուղար Նարեկ Սարգսյանը, Կրթության, մշակույթի և սպորտի վարչության պետի պաշտոնակատար Արփինե Մատինյանը և կրթական ծրագրերի համակարգող Դավիթ Հակոբյանը:
Անցնելով քննարկման թեմաներին՝ մարզպետ Հ. Մարգարյանը խստորեն հանձնարարեց զերծ մնալ ցանկացած քաղաքական գործընթացներից և բացառապես զբաղվել բուն գործառույթներով.
-Ձեր աշխատանքն ինքնին արդեն իսկ մեծ պատասխանատվություն է ենթադրում, ուստի կարևոր է, որ ձեր ողջ ներուժն օգտագործեք բացառապես կրթության ոլորտի առջև ծառացած խնդիրները, մատաղ սերնդի կրթության և դաստիարակության հարցերը լուծելու համար: Մեր նպատակն է Լոռին դարձնել հանրապետության այցեքարտը բոլոր առումներով, ուստի կարևոր է հանուն մեկ նպատակի համախմբումը: Անհնարին ոչինչ չկա, եթե միասնական կամք ու նպատակին հասնելու հաստատակամություն կա,-ասաց Հ. Մարգարյանը:
Նա իր խոսքում կարևորեց նաև դպրոցական խորհուրդների անկախ գործունեությունը: Մարզպետը հորդորեց նաև զերծ մնալ դպրոցները հարազատ-բարեկամներով համալրելու գործընթացից:
Ն. Սարգսյանն, իր հերթին անդրադառնալով տարածաշրջանում ներառական կրթության կազմակերպմանը, նշեց, որ Վանաձորում համակարգը ներդրվել է դեռևս 2009թ., իսկ նախորդ տարվանից ներառական կրթություն իրականացվում է բոլոր դպրոցներում: Նա ասաց, որ Վանաձորում գործում է հոգեբանամանկավարժական կենտրոն, որը համագործակցում է բոլոր դպրոցների հետ՝ աջակցելով ներառական կրթության իրականացմանը:
-Տեղյակ ենք, որ հատուկ մանկավարժների կարիք կա դպրոցներում, այդ իսկ պատճառով Վանաձորի պետական համալսարանի հետ քննարկում ենք առայժմ մագիստրոսական կրթական ծրագրերում ներառելու հատուկ մանկավարժի մասնագիտությունը, իսկ հետագայում նաև՝ բակալավրիատում: Մեզ այս հարցում աջակցում են նաև միջազգային կառույցները՝ վերապատրաստելով մանկավարժներին,- ասաց Ն. Սարգսյանը: Վերջինս խոսեց նաև տնային ուսուցման պատշաճ կազմակերպման, պարտուսից դուրս մնացած երեխաների խնդիրների մասին՝ այդ առումով կարևորելով դպրոցների սերտ համագործակցությունը համապատասխան կառույցների հետ: Ն. Սարգսյանն ընդգծեց դպրոցներում իրականացվող դրամաշնորհային ծրագրերի մասին մարզպետարանին պատշաճ իրազեկելու անհրաժեշտությունը, որպեսզի հարկ եղած դեպքում հնարավոր լինի աջակցել:
Այնուհետև տնօրեններն անդրադարձան դպրոցներում առկա խնդիրներին, որոնք հիմնականում ընդհանրական էին՝ սահմանային տեղերի, դպրոցներ տանող ճանապարհների անվտանգության և նորոգումների, սպորտդահլիճների բացակայության, ջեռուցման կազմակերպման, ֆինանսական միջոցների սղության, որոշ դպրոցներում նաև՝ համակարգիչների սակավության հետ կապված և այլնի հետ: Վերջիններիս առնչությամբ նշվեց, որ դրանց մեծ մասն ընդգրկված են կամ միջնաժամկետ կամ հրատապ ծրագրերում և մոտ ապագայում լուծում կստանան: Ինչ վերաբերում է համակարգիչների խնդրին, ապա ինչպես հայտնի է, Հնդկաստանի կառավարության և Հայաստանի համահայկական հիմնադրամի հետ համագործակցությամբ առաջիկայում մարզի բոլոր դպրոցները կհամալրվեն համակարգիչներով:
Բացի այդ բարձրացվեցին առավել ընդգրկուն խնդիրներ, որոնք վերաբերում էին կրթական ծրագրերի, չափոշիչների, դասագրքերի փոփոխությունների հետ կապված հրատապ խնդիրներին: Վերջիններիս վերաբերյալ մարզպետն առաջարկեց գրավոր առաջարկություններ ներկայացնել՝ վստահեցնելով, որ այն դրանք ամփոփ տեղեկանքով կներկայացվեն ԿԳ նախարարության քննարկմանը:
Հանդիպման ավարտին մարզպետը եղավ Վանաձորի թիվ 12, իսկ մարզպետարանի կրթության պատասխանատուները՝ թիվ 30 հիմնական դպրոցներում՝ տնօրենների կողմից բարձրացված խնդիրներին տեղում ծանոթանալու նպատակով: Թիվ 12 հիմնական դպրոցը, հիմնանորոգման կարիք ունի և ինչպես ականատես եղավ նաև մարզի ղեկավարը, հրատապ պետք է փոխվեն հատկապես պատուհանները, որոնք հնության պատճառով կարող են փշրվել և թափվել, ինչպես նաև տանիքը: Հ. Մարգարյանը խոստացավ առաջին իսկ հնարավորության դեպքում լուծում տալ այս խնդրին: Իսկ թիվ 30 դպրոցում դպրոցի տնօրենը մարզպետարանի պաշտոնյաների ուշադրությունը հրավիրեց այն խնդրին, որ դպրոցի երկու մասնաշենքերը կապող բաց տարածքը անձևների և ձնհալի հետևանքով ջրով է լցվում, ու այնուհետև ջրերը ներթափանցում են դպրոց: Նա խնդրեց հնարավորթյան դեպքում ծածկ կառուցել: