Տեղեկատվական կենտրոն
Նորություններ
Մեկ ամիս անց խոշորացված համայնքները կներկայացնեն մեկական ներդրումային ծրագիր
31.07.2018
![](http://lori.mtad.am/files/n_pics/16492_s.jpg)
Լոռու մարզպետի տեղակալ Անդրեյ Ղուկասյանի նախաձեռնությամբ այսօր հանդիպում էր կազմակերպվել մարզի խոշորացված համայնքների տնտեսական զարգացման պատասխանատուների հետ՝ մինչ այժմ վերջիններիս կողմից կատարված աշխատանքների, ապագա ծրագրերի, համայնքների զարգացման տեսլականների քննարկման նպատակով: Հանդիպմանը մասնակցում էր նաև մարզպետարանի զարգացման ծրագրերի, զբոսաշրջության և վերլուծության բաժնի պետ Հասմիկ Մկրտչյանը,«Վորլդ վիժն Հայաստան» կազմակերպության մարզային ներկայացուցիչները:
Փոխմարզպետն իր խոսքում նշեց, որ շատ համայնքներում տնտեսական զարգացման պատասխանատուների աշխատանքում պասսիվություն է նկատում, ինչը պարզապես անընդունելի է:
-Այսպիսի աշխատանքը համայնքների զարգացումը չի կարող խթանել: Համայնքները չեն կարող հանդես գալ միայն պահանջողի և ծախսողի դերում,այլ պետք է զարգացման ծրագրեր մշակեն, պարբերաբար ներդրումներ ներգրավեն,-ասաց Ա. Ղուկասյանը:
Հ. Մկրտչյանն իր հերթին նշեց, որ պետական աջակցությամբ իրականացվող այլ սուբվենցիաներ ծրագրին դիմել է մարզի ընդամենը 15 համայնք, ընդհանուր թվով ներկայացվել է 23 ծրագիր, ինչը չափազանց փոքր թիվ է:
Քանի որ այս ծրագրով ֆինանսավորումը սոցիալական բնույթի ծրագրերի դեպքում պահանջում է 60 տոկոս համայնքային և 40 տոկոս պետական բյուջեից ներդրում, իսկ տնտեսական բնույթի ծրագրերը՝ 40 տոկոս համայնքային և 60 տոկոս պետական բյուջեից ներդրում, ուստի ներկաները նշեցին, որ հիմնականում ծրագրեր չեն ներկայացնում ֆոնդային բյուջեի մասում գումարներ չունենալու կամ դրանց սակավության պատճառով: Որպես պատճառաբանություններ՝ նշվեցին նաև տնտեսական զարգացման պատասախանատուների գործառույթների ոչ հստակ սահմանազատումը, նրանց դերակատարության բարձրացման, ծրագրերի մշակման հարցում կարողությունների զարգացման անհրաժեշտությունը և այլն:
Նշված խնդիրներին ի պատասխան Ա. Ղուկասյանն առաջարկեց անկախ ֆինանսավորման աղբյուրներից՝ մշակել և ձեռքի տակ ունենալ զարգացման ծրագրերի պատրաստի փաթեթներ, որպեսզի ներդրումներ ներգրավելու դեպքում հնարավոր լինի դրանք առաջարկել ներդրողին: Ավելին՝ փոխմարզպետը հանձնարարեց մեկ ամիս անց կայանալիք հաջորդ հանդիպմանը ներկայացնել մեկական ներդրումային ծրագիր, փոքր համայնքների դեպքում նաև՝ զարգացման տեսլականներ:
«Վորլդ վիժն Հայաստան» կազմակերպության մարզային ներկայացուցիչներն առաջարկեցին ծրագրերի մշակման, բյուջեների կազմման դասընթացներ անցկացնել տնտեսական զարգացման պատասխանատուների համար: