Տեղեկատվական կենտրոն
Նորություններ
«Ամեն ինչ անելու ենք ժողովրդի վստահությունն ունենալու համար». նորանշանակ մարզպետ Հրանտ Մարգարյանը ներկայացվեց աշխատակազմին
01.06.2018
![](http://lori.mtad.am/files/n_pics/15698_s.jpg)
ՀՀ կառավարության նիստում այսօր կայացված որոշմամբ ՀՀ Լոռու մարզպետ նշանակվելուց հետո Հրանտ Մարգարյանը անմիջապես անցել է իր պարտականությունների կատարմանը: Նրան մարզպետարանի պատասխանատու պաշտոնյաներին և կառուցվածքային ստորաբաժանումների ղեկավարներին ներկայացրեց մարզպետարանի աշխատակազմի ղեկավար Նարեկ Սարգսյանը: Վերջինս նորանշանակ մարզպետին իր և մարզպետարանի աշխատակազմի անունից շնորհավորեց մարզի ղեկավարի պատասխանատու պաշտոնը ստանձնելու կապակցությամբ:
Մարզպետ Հրանտ Մարգարյանն, իր հերթին ողջունելով ներկաներին և շնորհակալություն հայտնելով շնորհավորանքների համար. նշեց, որ պատրաստակամ է աշխատելու բոլոր նրանց հետ, ովքեր արհեստավարժ են, պատասխանատու և ազնիվ իրենց աշխատանքում և կարող են իրագործել առաջադրված պահանջները:
-Կուսակցական պատկանելության որևէ խնդիր չի լինելու: Նպատակը մեր առջև դրված խնդիրները լուծելն է, իսկ գործունեության մեջ լինելու ենք առավելագույնը թափանցիկ և հաշվետվողական: Ամեն ինչ անելու ենք ժողովրդի վստահությունը ունենալու համար,- ասաց Հ. Մարգարյանը:
Այնուհետև ստորաբաժանումների ղեկավարները և ոլորտային պատասխանատուները ներկայացրին իրենց գործառույթները և ոլորտային խնդիրները: