Լոռու մարզպետի աշխատակազմ

 Այսօր Լոռու մարզպետ Արթուր Նալբանդյանն անցկացրեց հերթական աշխատանքային խորհրդակցությունը մարզպետարանի կառուցվածքային ստորաբաժանումների ղեկավարների և այլ պատասխանատու պաշտոնյաների մասնակցությամբ: Նա նախ և առաջ անդրադարձավ մայիսի 8-ին և 9-ին անցկացվելիք՝ համապատասխանաբար Երկրապահի օրվան և Հաղթանակների օրվան նվիրված միջոցառումներին՝ նշելով, որ ինքը և մարզային պաշտոնյաները պատշաճ կարգով կմասնակցեն հանդիսություններին:
Մարզի ղեկավարը հանձնարարականներ տվեց նաև դպրոցական ավարտական միջոցառումների՝ մասնավորապես Վերջին դասի և Վերջին զանգի հետ կապված՝ խստորեն պահանջելով բացառել դրամահավաքները և ճոխությունները, հնարավորության սահմաններում դրանք անցկացնել դպրոցներում: Ա. Նալբանդյանը Կրթության, մշակույթի և սպորտի վարչությանը ցուցում տվեց նաև աջակցել ավարտական քննությունների կազմակերպման աշխատանքներին, որպեսզի դրանք անցնեն բարձր մակարդակով:
Խոսելով գարնան գյուղատնտեսական աշխատանքների մասին՝ մարզպետը տեղեկացրեց, որ գարնանացանն ամբողջությամբ ավարտված է, բաշխվել է նաև պետական աջակցությամբ մատչելի գներով համայնքներին տրվող պարարտանյութը: Ա. Նալբանդյանը հույս հայտնեց, որ այսուհետ ևս եղանակը բարեհաճ կգտնվի և լավագույն բերք ստանալու գյուղատնտեսների կանխատեսումները իրականություն կդառնան:
Մարզպետը մտահոգություն հայտնեց, սակայն, սեփական եկամուտների հավաքագրման առումով: Եթե այս տարվա առաջին եռամսյակում հավաքագրման մակարդակը բարձր էր և խոստումնալից, ապա 4-րդ ամսում զգալիորեն անկում է արձանագրվել, ինչը կարող է լրջորեն անդրադառնալ համայնքային բյուջեների վրա՝ իր բոլոր հնարավոր վատ հետևանքներով: Ուստի նա փոխմարզպետներին և համապատասխան վարչությունների ղեկավարներին խստորեն հանձնարարեց բացատրական աշխատանքներ տանել, ջանքեր չխնայել իրավիճակը շտկելու համար:
-Մեր նպատակը կայուն տնտեսությամբ, զարգացած երկիր ունենալն է և մեզնից յուրաքանչյուրը այդ հարցում ունի պատասխանատվության իր բաժինը,-ասաց
մարզպետը:
Նա մարզպետարանի բոլոր ստորաբաժանումների ղեկավարներին հորդորեց աշխատել բնականոն հունով, գործառույթներն իրականացնել ամենաբարձր մակարդակով: