Լոռու մարզպետի աշխատակազմ

Մարզպետ Արթուր Նալբանդյանի կողմից Լոռին «Սմարթ» մարզ հայտարարելու գաղափարակիր փորձում են դառնալ նաև գյուղական համայնքների դպրոցները՝ հնարավորության սահմաններում գումարներ տնտեսելով և «Սմարթ» դասարաններ կառուցելով ու կահավորելով: Ահա այսպիսի դպրոցներից է Ջրաշեն համայնքի միջնակարգը, որտեղ խնայված միջոցներով «Սմարթ» դասարան է կառուցվել: Դասարանի մակերեսը կազմում էր 59.2 քառ մետր: Ծրագրի շրջանակներում կատարվել են հետևյալ աշխատանքները. լամինատե հատակների կառուցում, հարդարման աշխատանքներ, ՄԴՖ-ով երեսապատված մետաղական դռան տեղադրում, ներքին լուսավորության ապահովում և էլ. ջեռուցման համակարգերի տեղադրում, օդամղիչի և պատուհանների շերտավարագույրների տեղադրում: Ծրագրի նախահաշվային արժեքը կազմել է 2 մլն 470 հազ.դրամ, պայմանագրային արժեքը՝ 1մլն 210 հազ.դրամ: Շինաշխատանքներն իրականացրել է «Պիրզմա վան» ՍՊԸ-ն:
Դասասենյակը հագեցվել է նաև ժամանակակից տեխնիկական միջոցներով:
Մարզպետ Արթուր Նալբանդյանի և պատասխանատու պաշտոնատար անձանց այցը դպրոց բավականին սպասված էր: Դպրոցի աշակերտները ուսուցիչների օգնությամբ տեղեկատվական տեխնոլոգիաների և ժամանակակից մեթոդների կիրառմամբ ի ցույց դրեցին իրենց գիտելիքները ֆիզիկա և անգլերեն լեզու առարկաներից: Դպրոցի տնօրենը, ուսուցչական կազմը և աշակերտները շնորհակալություն հայտնեցին մարզի ղեկավարին ծրագրի իրականացմանն աջակցելու համար: Ա. Նալբանդյանն իր հերթին հորդորեց դասասենյակը ծառայեցնել բոլոր դասաժամերի կազմակերպման համար, հնարավորություն ընձեռել, որպեսզի դասասենյակի հնարավորություններից օգտվեն թե՛ ուսուցիչները և թե՛ աշակերտները: Նա հանգամանորեն խոսեց նաև «Սմարթ» նախաձեռնության մասին՝ մասնավորապես տեղեկացնելով, որ Վանաձորի տեխնոլոգիական կենտրոնի հետ համատեղ ներկայում ընթանում է դպրոցների ինֆորմատիկայի ուսուցիչների վերապատրաստում, որը շարունակական է լինելու՝ կատարելագործվելու հնարավորություն ընձեռելով «Սմարթ» դասասենյակներ ունեցող դպրոցների ուսուցիչներին՝ նպատակին ծառայեցնելու իրենց գիտելիքները:
Մարզի ղեկավարը եղավ նաև Ջրաշենի մանկապարտեզում, որը հիմնանորոգվում է համայնքային միջոցներով: