Լոռու մարզպետի աշխատակազմ

Լոռու մարզկենտրոնի փողոցների բարեկարգման համար ՀՀ կառավարության պահուստային ֆոնդից Լոռու մարզպետարանին հատկացված 290,863,6 հազար դրամի շրջանակներում աշխատանքները մարզի ղեկավարի պահանջով մեկնարկեցին սեպտեմբերի 15-ին և ընթանում են բուռն թափով: Շինաշխատանքները ժամանակակից տեխնիկայով և բավարար քանակությամբ աշխատուժով իրականացնում են մրցույթում հաղթող ճանաչված «Հիդրո», «Վառմաշ» և «Շինպլյուս» ՍՊԸ-ները:
Ծրագրում ընդգրկված են Վանաձորի Վարդանանց, Զ. Անդրանիկի, Հալաբյան, Աղայան, Ուսանողական, Շինարարների, Մյասնիկյան, Նժդեհի, Շիրակացու, Թումանյան, Ներսիսյան, Զորյան, Տավրոսի 6-րդ, Դեմիրճյան փողոցների, Երևանյան խճուղու, Լոռու հրապարակից մինչև Նարեկացու փողոցի վերանորոգման (կամուրջ) աշխատանքները:
Աշխատանքների ընթացքին հենց մեկնարկի օրվանից խստագույնս հետևում են մարզպետարանի քաղաքաշինության վարչության աշխատակիցները՝ վարչության պետ Արմեն Ջանազյանի գլխավորությամբ: Վերջինիս հավաստմամբ վանաձորցիները որակի զգալի տարբերություն կնկատեն: Այս հարցում խիստ հետևողական է լինելու հատկապես մարզպետ Արթուր Նալբանդյանը:
-Ամեն ինչ կարվի, որպեսզի աշխատանքներն ավարտվեն ժամկետների մեջ,-ասում է Ա. Ջանազյանը և վարորդներին խնդրում համբերատարություն ցուցաբերել, քանի որ աշխատանքների ծավալը բավականին մեծ է: