Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Ախթալայում նախատեսվում է հիմնել Ժակ դը Մորգանի անվան թանգարան
29.06.2017
Ախթալայում ֆրանսիացի հնագետ, պատմաբան, հայ ժողովրդի մեծ բարեկամ Ժակ դը Մորգանի անվան թանգարան հիմնելու ծրագրի շրջանակներում եռօրյա գործնական այցով Լոռու մարզում էին Օտ-Տեղ-դը-Պրովանս կազմակերպության ծրագրերի համակարգող Դանիել Գերասիմենկոն և Ֆրանսիայի Սեն Ժերմեն-ան-Լեյ թանգարանի հնագիտության բաժնի տնօրեն Քրիստին Լորը:
Նրանք այսօր հանդիպեցին մարզի ղեկավարի հետ՝ ներկայացնելու եռօրյա այցի ընթացքում ձեռք բերված պայմանավորվածությունները և հետագա անելիքները: Հանդիպմանը ներկա էին նաև մարզպետի խորհրդական Լևոն Ասլանյանը, մարզպետարանի կրթության, մշակույթի և սպորտի վարչության պետ Մինաս Սայադյանը և զարգացման ծրագրերի և վերլուծության բաժնի պետ Հասմիկ Մկրտչյանը:
Լոռու մարզպետարանի, Պրովանս Ալպ կոտ- Դ՛Ազյուր ռեգիոնի, Օտ-Տեղ-դը-Պրովանս կազմակերպության նախաձեռնությամբ և Սեն Ժերմեն-ան-Լեյ թանգարանի հետ համագործակցությամբ իրականացվող ծրագրի շրջանականերում նախատեսվում է Ախթալայի վանական հուշարձանախմբի չօգտագործվող հուշարձաններից մեկը նորոգելով՝ այն վերածել Ժան-Ժակ դը Մորգանի անվան թանգարանի՝ իհարկե պահպանելով ճարտարապետական տեսքը: Հյուրերը ներկայացրեցին, որ մարզի ղեկավարի միջնորդությամբ այս հարցով նախորդ օրերին հանդիպել են ՀՀ գիտությունների ազգային ակադեմիայի հնագիտության և ազգագրության ինստիտուտի տնօրեն, մորգանագետ Պավել Ավետիսյանի, ՀՀ մշակույթի փոխնախարար Արև Սամուելյանի, Հայաստանի պատմության պետական թանգարանի տնօրեն Գրիգոր Գրիգորյանի հետ, պատրաստվում են ստանալ նաև Մայր Աթոռ Սուրբ Էջմիածնի համաձայնությունը և այդ նպատակով հանդիպում կունենան Գուգարաց թեմի առաջնորդ տեր Սեպուհ արքեպիսկոպոս Չուլջյանի հետ:
Ներկայացված հարցերի շուրջ քննարկում ծավալվեց: Մարզպետը չափազանց կարևորեց ծրագրի իրականացումը հատկապես զբոսաշրջության զարգացման առումով: Նա պատրաստակամություն հայտնեց հարցը ներկայացնելու նաև ՀՀ վարչապետին՝ աջակցության ակնկալիքով:
Քննարկվեցին նաև թանգարանի գործունեության հետ կապված հեռահար ծրագրեր՝ մասնավորապես բարձր տեխնոլոգիաների կիրառմամբ ցուցանմուշների թվայնացման, 3D ցուցադրությունների և այլնի հետ՝ օգտագործելով Վանաձորի տեխնոլոգիական կենտրոնի տեղեկատվական տեխնոլոգիաների բնագավառում աշխատող մասնագետների հնարավորությունները:
