Պաշտոնական էլ. փոստ

(միայն www.e-citizen.am համակարգով ծանուցումների համար)

Տպել

Տեղեկատվական կենտրոն

Նորություններ

Ուխտագնացությունը նվիրված էր Սուրբ Հովհան Օձնեցի Կաթողիկոսի գահակալության 1300-ամյակին

18.04.2017

 Դարեր շարունակ ուխտագնացության և հոգեկան հաղորդակցության աստվածապարգև սրբազան վայր է եղել Սուրբ Հովհան Իմաստասեր Օձնեցի Կաթողիկոսի շիրիմը:

Գուգարաց թեմի առաջնորդ Տեր Սեպուհ արքեպիսկոպոս Չուլջյանի օրհնությամբ  հաստատված և ավանդություն դարձած համաթեմական ուխտագնացությանը ամեն տարի ոգեշնչող կարգախոսով ուխտավորները առաջնորդվել են դեպի սրբավայր:

Այս տարի արդեն Սուրբ Հովհան Օձնեցի Կաթողիկոսի գահակալության 1300-ամյակի առթիվ, ապրիլի 17-ին` Սուրբ Հայրապետի ննջման հիշատակության օրը, թեմակալ առաջնորդ Սեպուհ Սրբազանի օրհնությամբ, դարձյալ կազմակերպվեց համաթեմական ուխտագնացություն դեպի Արդվի և Օձուն: Նախորդ տարիների պես, այս տարի ևս, Սրբի շիրիմին խոնարհվելու և բարեխոսություն խնդրելու էին եկել հարյուրավոր ուխտավորներ Լոռու մարզի տարբեր շրջաններից և Հայաստանի այլ մարզերից ու սփյուռքից:

Ուխտագնացությանը մասնակցում էր Լոռու մարզպետ Արթուր Նալբանդյանը, «Լոռվա Ձորե հայրենակցական միության նախագահ Սերգո Երիցյանը, Մայր Աթոռի ճարտարպետ Արա Վարդանյանը, համայնքապետեր և այլ պաշտոնատար անձինք: Վանաձոր քաղաքից մասնակից ուխտավորների ուխտագնացության հովանավորն էր նաև Լոռու մարզպետը:

Երիտասարդ ուխտավորները, թեմի հոգևոր հովիվների հետ միասին` շուրջ 1500 ուխտավոր, հոգևոր դասի առաջնորդությամբ, խաչերով, խաչվառներով գյուղամիջից խաչերթով շարժվեցին դեպի սրբավայր: Սրբանեսի վանքում պատարագիչն էր Ախթալայի հոգևոր հովիվ Տեր Հեթում քահանա Թարվերդյանը:

Սուրբ Պատարագի ավարտին Սրբազան Հայրն օրհնեց և իր հայրական հորդորն ուղղեց բոլոր ուխտավորներին:

Նույն օրը նաև ազդարարվեց Հովհան Օձնեցու գահակալության 1300-ամյակի միջոցառումների սկիզբը: Այս տարի նախատեսվում է Գուգարաց թեմի, Լոռու մարզպետարանի և «Լոռվա Ձոր» հայրենակցական միության հետ համագործակցաբար կազմակերպել գիտաժողովներ, Հայրապետին վերաբերվող գրքերի վերահրատարակություն, նրա կիսանդրի քանդակում և տեղադրում, մատուռ-զանգակատան վերանորոգում, ինչպես նաև մարզի ղեկավարի հովանավորությամբ Հոռոմայրի վանական համալիրի կազմում ընդգրկված Սբ. Նշան եկեղեցու վերին հատվածի վերակառուցում:

 

 

← Վերադառնալ ցուցակին

Բաժանորդագրում նորություններին

Տեխնիկական դիտողություններն կարող եք ուղարկել կայքի վեբ-մաստերի էլեկտրոնային փոստին: Կայքը պատրաստված է Helix ընկերության կողմից:
Վերջին թարմացումը՝ 2017-11-20 11:49:46