Տեղեկատվական կենտրոն
Նորություններ
Հեռավար դասընթաց Վանաձորի թիվ 4 և Վահագնաձորի դպրոցների 5-րդ դասարանցիների մասնակցությամբ
11.11.2016
Նոյեմբերի 11-ին, հեռահաղորդակցային կապի հաստատման միջոցով հեռավար դասընթացի մասնակից դարձան Վանաձորի թիվ 4 և Վահագնաձորի հիմնական դպրոցների 5-րդ դասարանների աշակերտները: Երկու դպրոցների տնօրինությունների և ուսուցչական կազմի ջանքերով հետաքրքիր և ուսուցողական դաս անցկացվեց մաթեմատիկա առարկայինց: Դասն ուղեկցվեց հարցադրումներով: Նույն հարցին միաժամանակ պատասխանում էին և' Վահագնաձորի դպրոցի, և' Վանաձորի թիվ 4 դպրոցի աշակերտները՝ հավաքելով անհրաժեշտ միավորներ: Նույն տնային առաջադրանքը հանձնարարվեց 2 կողմին էլ: Դասին ներկա էր նաև Լոռու մարզպետարանի կրթության, մշակույթի և սպորտի վարչության գլխավոր մասնագետ Անահիտ Բարոյանը, ով մեծ գոհունակություն հայտնեց դասի ընթացքի և վարման կարգի մասին: Վանաձորի թիվ 4 դպրոցը պատարաստակամություն հայտնեց հեռավար դասընթացներ անցկացնել նաև առանձին առարկաներից մասնագետ ուսուցիչների պակաս ունեցող, ինչպես նաև Ռուսաստանի Դաշնությունում կիրակնօրյա դպրոցներ հաճախող հայազգի աշակերտների հետ:
Ի դեպ, սա հեռավար դասընթացի անցկացման արդեն երկրորդ փորձն էր Լոռու մարզում: ՀՀ վարչապետ Կարեն Կարապետյանի հանձնարարականով գյուղական դպրոցների զարգացման հայեցակարգի շրջանակում նախատեսված հեռահաղորդակցային կապի հաստատման միջոցով առցանց ռեժիմով դասեր վարելու առաջին փորձը նույնպես իրականացվել է Լոռու մարզում. այն ժամանակ Լոռու մարզպետարանի կրթության, մշակույթի և սպորտի վարչության համակարգմամբ հեռավար դասընթացի մասնակից էին դարձել Վանաձորի թիվ 19 և Փամբակի հիմնական դպրոցի 8-րդ դասարանների աշակերտները: Դասի թեման Եղիշե Չարենցի «Ես իմ անուշ Հայաստանի» բանաստեղծությունն էր: