Լոռու մարզպետի աշխատակազմ

Լոռու մարզպետարանի ֆինանսական և սոցիալ-տնտեսական զարգացման վարչությունում 15-օրյա ուսումնական պրակտիկա անցնող Վանաձորի պետական համալսարանի պատմաաշխարհագրական ֆակուլտետի «Կառավարում» բաժնի 29 ուսանող այսօր հանդիպում ունեցան Լոռու մարզպետ Արթուր Նալբանդյանի հետ:

Ողջունելով երիտասարդներին՝ մարզի ղեկավարը նախ ցանկացավ տեղեկանալ՝ պրակտիկայի ավարտին ի՞նչ փորձով ու գիտելիքներով են ուսանողները հեռանում մարզի գլխավոր կառույցից, ապա անկեղծ ու անկաշկանդ զրույցի հրավիրեց նրանց:

Ուսանողները նշեցին, որ մինչ մարզպետարան մուտք գործելը և մարզպետարանի ստորաբաժանումների գործառույթներին ծանոթանալը պատկերացում անգամ չեն ունեցել, թե ինչպիսի մեծածավալ ու պատասխանատու աշխատանք է այստեղ իրականացվում: Նրանք վստահեցրեցին, որ բավականին հարուստ գիտելիքներ են հավաքել պրակտիկայի ընթացքում և ուսումնական գործընթացին վերադառնում են լիովին բավարարված:

Մարզպետը ներկայացրեց մարզպետարանի՝ որպես պետական կառավարման համակարգի, տեղական ինքնակառավարման մարմինների գործունեության ոլորտները: Նա  խոսեց նաև մարզի սոցիալ-տնտեսական զարգացման հեռանկարներից:

-Ներկայում մշակման փուլում է մարզի սոցիալ-տնտեսական զարգացման 2017-2025թ.թ. ռազմավարական ծրագիրը՝ պատասխանատու փաստաուղթ, որն ուղղորդելու է մեզ մարզի զարգացման հետևողական քայլեր իրականացնելու: Մշակման փուլում են նաև  մարզի համայնքների 5-ամյա զարգացման ծրագրերը, որոնց մշակման հարցում մարզպետարանի ստորաբաժանումները համայնքներին մեթոդական և խորհրդատվական աջակցություն են ցուցաբերում,-ասաց մարզի ղեկավարը:

Նա իր խոսքում կարևորեց հատկապես կրթության ոլորտում իրականացվող բարեփոխումները:

-Աղքատության հաղթահարման առաջին կարևոր պայմանը որակյալ կրթություն ապահովելն է, որակյալ կրթական համակարգի ներդրումը,-ասաց Ա Նալբանդյանը ուսանողներին հորդորելով լավ սովորել, լինել պատասխանատու, պատրաստակամ ու ջանացավ քաղաքացի.

-Մեզնից յուրաքանչյուրն իր տեղում, իր չափով պատասխանատվություն է կրում մեր երկրի բարեկեցիկ ապագայի համար,-ասաց մարզպետը:

Նա պատասխանեց նաև երիտասարդների հարցերին: