Տեղեկատվական կենտրոն
Նորություններ
Աջակցություն թալիշցի դպրոցահասակ երեխաներին
06.09.2016
Ապրիլյան մարտական գործողությունների հետևանքով իրենց բնօրրանից տարհանված ԼՂՀ թալիշցիների 12 ընտանիք հանգրվանեց Լոռու մարզում` մեծամասամբ Շահումյան գյուղում: Մարզային իշխանությունները, Շահումյանի գյուղապետարանը հնարավոր աջակցություն են ցուցաբերել տարագիր ընտանիքներին, նյութապես ու հոգեբանորեն սատարել նրանց: Մասնավորապես հոգ է տարվել դպրոցահասակ երեխաներին նոր ուսումնական տարվան նախապատրաստելու համար. տրամադրվել են պայուսակներ, գրենական պիտույքներ և այլն:
Վանաձորի Երևանյան խճուղու 147 շենքում է ժամանակավորապես ապաստանել նաև Մուսայելյանների ընտանիքը: Լոռու մարզպետ Արթուր Նալբանդյանի հանձնարարությամբ երեկ նրանց այցելեցին մարզպետարանի աշխատակազմի ղեկավարի տեղակալ Վալերի Խաչատրյանն ու ընտանիքի, կանանց և երեխաների պաշտպանության բաժնի աշխատակից Անի Ղազարյանը, ովքեր հաղորդակից եղան ընտանիքի հոգսերին, պատասխանեցին նրանց հետաքրքրող հարցերին, իսկ դպրոցահասակ չորս երեխաներին նվիրեցին «Լոռու դպրոց» հիմնադրամի միջոցներով գնված պայուսակներ ու գրենական պիտույքներ: Թալիշցիների այս ընտանիքն էլ, երախտապարտ լինելով իրենց նկատմամբ ցուցաբերված ուշադրության համար, այնուամենայնիվ տրամադրված է բնակվելու համար քիչ թե շատ հարմարավետ պայմանների դեպքում կրկին վերադառնալու հարազատ Մարտակերտի շրջան: