Տեղեկատվական կենտրոն
Նորություններ
Անցկացվեց «Գարգառ ֆեստ» միջոցառումը
26.07.2016
«Լույս» հիմնադրամի «Զարգացնենք Հայաստանը միասին» ծրագրի մասնակիցների կողմից Գարգառ գյուղի համայնքային զարգացմանն ուղղված ծրագրերի ցուցադրություն էր կազմակերպվել գյուղի պուրակում: Միջոցառումը կրում էր «Գարգառ ֆեստ» խորագիրը: Ծրագրի մասնակիցներն այս տարի բազմաթիվ կրթական, մշակութային, տեղեկատվական տեխնոլոգիաների, գյուղատնտեսության, առողջապահության, սպորտի զարգացմանն ուղղված, ինչպես նաև բնապահպանական ծրագերեր են իրականացրել համայնքում և վստահ են, որ Գարգառը զարգացման իրատեսական հեռանկարներ ունեցող համայնք է: Այդ ծրագրերի մասին պատմող տեղեկատվական բուկլետների, ձեռքի աշխատանքների, ինչպես նաև համայնքում արտադրված օրգանական բնամթերքի, համեղ ուտեստների ցուցադրություն էր կազմակերպվել: Միջոցառման ընթացքում կազմակերպվեցին նաև հետաքրքրաշարժ խաղեր, ներկայացվեցին հայ ազգագրական երգեր, պարեր, մարզական ցուցադրական ելույթներ:
Միջոցառմանը մասնակցում էր Լոռու մարզպետի տեղակալ Տիգրան Բադոյանը, մարզպետարանի տեղեկատվության և հասարակայնության հետ կապերի բաժնի պետ Վահե Դոխոյանը, համայնքի ղեկավար Կարեն Զալինյանը: Տ. Բադոյանն իր խոսքում կարևորեց «Լույս» հիմնադրամի աջակցությունը, բարձր գնահատեց համայնքի ղեկավարի, երիտասարդության ակտիվությունն ու նախաձեռնողականությունը Գարգառում բազմաբովանդակ զարգացման ծրագրերի իրականացման գործում: