Լոռու մարզպետի աշխատակազմ

Սեփական եկամուտների հավաքագրման կատարողականներ, առաջիկա ՏԻՄ ընտրություններ, գարնան գյուղատնտեսական աշխատանքներ, ամառային զորակոչ, զբոսաշրջային սեզոնին ընդառաջ. ահա այն հարցերի շրջանակը, որոնք քննարկվեցին հունիսի 23-ին Լոռու մարզպետի՝ Ալավերդի քաղաքում հրավիրած արտագնա նիստի ընթացքում: Մասնակցում էին մարզպետի տեղակալ Ա.Դարբինյանը, մարզպետարանի մի քանի ստորաբաժանումների պետեր, Թումանյանի տարածաշրջանի համայնքների ղեկավարներ:

Հունիսի 22-ի դրությամբ սեփական եկամուտների հավաքագրման ցուցանիշերը ներկայացրեց ֆինանսատնտեսական վարչության պետ Հ. Պապոյանը: Նրա տեղեկացմամբ, տարածաշրջանը ընդհանուր առմամբ պլանը թերակատարում է ավելի քան 20 մլն դրամով, որի հիմնական բաժինն ընկնում է Շնող (ավելի քան 8.5 մլն դրամ), Թումանյան (3.5 մլն դրամ), Ճոճկան (շուրջ 2.4 մլն դրամ), Հաղպատ (ավելի քան 1.3 մլն դրամ), Ծաթեր (ավելի քան 1 մլն դրամ), Արևածագ (648 հազար դրամ) համայնքներին:

Շնող, Ճոճկան, Ծաթեր, Ալավերդի և Թումանյան համայնքները թերացել են հողի հարկի հավաքագրման գործում՝ տարածաշրջանի ցուցանիշը նվազեցնելով 8 մլն 977 հազար դրամով:

Ավելի քան 9.3 մլն դրամով թերակատարվել է նաև գույքի վարձակալության, մոտ 1.5 մլն դրամով՝ տեղական տուրքի պլանը, իսկ գույքահարկի առաջադրանքը գերազանցվել է 2 մլն դրամով:

  Մարզպետը անընդունելի համարեց ցանկացած թերացում, հատկապես, եթե համայնքապետերի գալիք ընտրությունների շեմին նրանք դա հանդուրժում են ընտրողներին հաճոյանալու չարդարացվող սկզբունքով:

-Ի վերջո ցանկացած եկամտահարկի թերհավաքագրումը բացասաբար է անդրադառնում հենց տվյալ համայնքի ընդհանուր շահերի վրա, ավելացնում բնակիչների պարտքը: Նման սկզբունքով առաջնորդվող համայնքապետերը կամա թե ակամա աշխատում են ի վնաս սեփական բնակավայրի շահերի ու բարեկեցության,- ասաց մարզպետը՝ խստորեն պահանջելով վերանայել իրենց վերաբերմունքն այդ հարցում:

Խոսելով առաջիկա ՏԻՄ ընտրությունների առանձնահատկություններից, հատկապես մտահոգություն հայտնելով որոշ համայնքներում ավագանու աշխատանքի անարդյունավետությունից՝ Ա. Նալբանդյանը խորհուրդ տվեց ավագանիների առաջադրման հարցում գերապատվություն տալ կանանց թեկնածություններին և այն անձանց, ովքեր մշտապես համայնքում են, չեն մեկնում արտագնա աշխատանքի:

Գյուղատնտեսության և բնապահպանության վարչության պետ Գ. Հակոբյանը ամփոփ տեղեկատվություն ներկայացրեց գարնան գյուղատնտեսական աշխատանքների ընթացքի մասին, որն ավարտական փուլում է, ապա անդրադարձավ պետական աջակցությամբ համայնքներին հատկացված քիմիական պարարտանյութերի գումարների հավաքագրման գործընթացին, որն, ի դեպ, բարվոք չէ Այգեհատ, Արևածագ, Ծաթեր, Օձուն, Կարմիր Աղեգ համայնքներում:

Մարզի ղեկավարը պահանջեց շուտափույթ կերպով մարել պարտքերը:

Խորհրդակցությանը գյուղապետերից մի քանիսը հիմնավոր փաստարկներով ահազանգեցին հակակարկտային կայանքների ոչ արդյունավետ աշխատանքի մասին: Մարզպետն առաջարկեց շահագրգիռ կողմերի մասնակցությամբ մարզպետարանում կազմակերպել հանդիպում, բարձրացված հարցերի պարզաբանման համար:

Ա. Նալբանդյանը մի շարք հանձնարարականներ տվեց նաև զբոսաշրջային սեզոնը պատշաճ մակարդակով անցկացնելու վերաբերյալ՝ հատկապես կարևորելով մերձհամայնքային ճանապարհների մաքրությունն ու սանիտարիայի պահպանումը: Անդրադարձ կատարվեց նաև ամառային զորակոչի աշխատանքներին:

Աշխատանքային օրվա ավարտին մարզպետ Ա. Նալբանդյանը մարզպետի տեղակալ Ա.Դարբինյանի, Ալավերդու քաղաքապետ Կ. Փարեմուզյանի, մարզպետարանի վարչությունների պետերի մասնակցությամբ կատարեց քաղաքացիների ընդունելություն: Սոցիալական, առողջապահական հարցերով դիմած բոլոր քաղաքացիները ստացան դրական պատասխան: Իսկ աշխատանքի տեղավորման, բնակարան ստանալու, թաղամասի գազաֆիկացման և այլ հարցերով ընդունելության եկած բնակիչներին տեղեկացվեց, որ նրանց դիմումներին համապատասխան ընթացք կտրվի դրանք քննարկելու արդյունքում: