Լոռու մարզպետի աշխատակազմ

Հունիսի 17-ին արտակարգ խորհրդակցություն հրավիրեց Լոռու մարզպետ Ա. Նալբանդյանը: Մասնակցում էին մարզպետի տեղակալներ Ա.Դարբինյանը, Տ.Բադոյանը, Հովհ.Թադևոսյանը, աշխատակազմի ղեկավար Ն.Սարգսյանը, մարզպետարանի ստորաբաժանումների պետերը:

Քննարկման առարկան վերջին  օրերին տևական անձրևների և կարկտահարության հետևանքով  մարզի բազմաթիվ համայնքներին հասցված վնասներն էին: Մարզպետը նշեց, որ մարզի շատ բնակավայրերում, հատկապես Թումանյանի տարածաշրջանի համայնքներում ուժգին  հեղեղումները ուղեկցվել են ներհամայնքային ու միջհամայնքային ճանապարների փլուզումներով: Ուժեղ քամիների ու կարկտահարության հետևանքով զգալիորեն տուժել են տասնյակ  գյուղերի այգիներն ու ցանքատարածությունները, գետերի հեղեղումների ու սելավաջրերի հետևանքով դժվարացել են տրանսպորտային  միջոցների երթևեկության պայմանները: Տարերային աղետներից տուժած համայնքների բնակիչները դիմել են մարզի ղեկավարությանը համապատասխան միջոցներ ձեռք առնելու խնդրանքով:

Քննարկման մասնակիցները արտահայտեցին իրենց նկատառումները, հանդես  եկան առաջարկություններով: Ունկնդրելով խնդրի շուրջ բոլոր տեսակետները` մարզպետ Ա. Նալբանդյանը կոնկրետ հանձնարարականներ տվեց իրավասու վարչությունների պետերին:

ՏԻ և ՀԳՄ հարցերով  վարչության պետ Դ.Մանուչարյանին հանձնարարվեց շրջաբերական գրությամբ դիմել համայնքների  ղեկավարներին համայնքի տարածքում հեղեղատարների,  սելավատարների և գետերի հուների  մաքրման աշխատանքներ  կազմակերպելու և անցկացնելու նպատակով, որպեսզի հնարավորինս  բացառվեն հեղեղումներն ու փլուզումները:

Քաղաքաշինության վարչության պետ  Ա.Ջանազյանին հանձնարարվեց  քամուց, անձրևներից և սելավներից համայնքային ճանապարհներին պատճառված վնասների     վերաբերյալ համայնքներից ստացված տեղեկությունների և կատարված ուսումնասիրությունների հիման վրա մեկօրյա ժամկետում ներկայացնել տեղեկատվություն և առաջարկություններ  ՀՀ տարածքային կառավարման և զարգացման նախարարին, իսկ մարզային ենթակայության ճանապարհների վերաբերյալ նաև` ՀՀ տրանսպորտի և  կապի նախարարին:

         Կարկուտի և ուժեղ քամիների հետևանքով մարզի համայնքների ցանքատարածքներին պատճառված  վնասները գնահատելու նպատակով տեղերում ուսումնասիրություններ կատարելու, արդյունքների մասին զեկուցելու և  առաջարկություններ  ներկայացնելու հանձնարարական ստացավ աշխատակազմի   գյուղատնտեսության և բնապահպանության   վարչության պետ  Գ. Հակոբյանը: