Տեղեկատվական կենտրոն
Նորություններ
Լոռի - ՊԱԿԱ ագրոտուրիզմի զարգացման ծրագիրը նոր փուլում է
15.04.2016
Ագրոտուրիզմը Լոռու մարզի զարգացման կարևորագույն ուղղություններից է և մշտապես գտնվում է մարզպետ Արթուր Նալբանդյանի ուշադրության կենտրոնում: Վերջնական նպատակը մարզում ագրոտուրիզմի զարգացման ուղղությամբ ռազմավարական նորանոր նախագծերի ներդրումն է և անհրաժեշտ ռեսուրսների ներգրավումը:
Ոլորտի զարգացման ծրագրերի իրականացման հերթական երկօրյա միջոցառումն իրականացվեց Հայաստանի ազգային ագրարային համալսարանի Վանաձորի մասնաճյուղում: Լոռու մարզի և Ֆրանսիայի ՊԱԿԱ ռեգիոնի միջև համագործակցության շրջանակներում անցկացվեց ֆերմերների պիլոտային խմբի վերապատրաստման դասընթաց: Այն վարում էին Հայաստանում և Ֆրանսիայում ագրոտուրիզմի գծով վերապատրաստում անցած պիլոտային խմբի դասախոսները:
Դասընթացին մասնակցում էին «Լոռու ագրոտուրիզմ» ասոցիացիայի (ԼԱՏԱ) կայացման ուղղությամբ կազմակերպական մեծ գործառույթ իրականացրած Լոռու մարզպետարանի ներկայացուցիչները` Լոռու մարզպետի խորհրդական Լևոն Ասլանյանը, Լոռու մարզպետարանի Զարգացման ծրագրերի և վերլուծության բաժնի պետ Հասմիկ Մկրտչյանը և նույն բաժնի առաջատար մասնագետ Աննա Աղվանյանը, մարզի առաջատար 10 ֆերմերներ, որոնք նաև բոլորովին վերջերս ձևավորված ԼԱՏԱ-ի անդամներ են:
Դասընթացներին ներկա էր նաև Ագրոտուրիզմի զարգացման ծրագրի ֆրանսիական կողմի ղեկավար, վերապատրաստումների ճարտարագիտության գծով ՊԱԿԱ ռեգիոնի փորձագետ, CRIPT-ի ներկայացուցիչ Միրիամ Բորելը: Վերջինս հանդես եկավ հատուկ դասախոսությամբ: Մասնակիցների թվում էր նաև դասընթացների անցկացմանը սատարող Ագրարային համալսարանի Վանաձորի մասնաճյուղի տնօրեն Ալեքսանդր Հակոբյանը:
Վերապատրաստման ամբողջ ընթացքում շեշտը դրված էր ագրոտուրիզմի ոլորտին առնչվող կարևորագույն թեմաների ներկայացմանը` նորագույն մոտեցումներով և ինտերակտիվ մեթոդով: Իրականացվեց նաև Լոռու մարզի ֆերմերների արտադրած արտադրատեսակների լաբորատոր փորձարկում: