Լոռու մարզպետի աշխատակազմ

 Գուգարաց թեմի առաջնորդանիստ Սբ. Գրիգոր Նարեկացի եկեղեցու դահլիճում, նախագահությամբ թեմակալ առաջնորդ Տեր Սեպուհ արքեպիսկոպոս Չուլջյանի, տեղի ունեցավ թեմի հոգևոր դասի հանդիպումը Լոռու մարզպետ Արթուր Նալբանդյանի հետ: Նախորդ տարիներին նույնպես թեմում պարբերաբար կազմակերպվել են նմանատիպ հանդիպումներ, որոնց նպատակն է ամրացնել համագործակցությունը մարզպետարանի, համայնքապետերի և թեմի միջև: Հանդիպմանը քահանա հայրերն իրենց հետաքրքրող հարցերով դիմեցին մարզպետին, ներկայացրին առաջարկներ, իրենց մտահոգությունները հայտնեցին արտագաղթի և գյուղերում  տիրող սոցիալական վիճակի վերաբերյալ:

Թեմի գլխավոր հաշվապահը խոսեց մարզում և մասնավորապես թեմում ժողովրդի անվճարունակության, մոմի վաճառքի նվազման և արտերկրից եկող տրանսֆերների պակասի պատճառով առաջացած ֆինանսական ճգնաժամի մասին՝  նշելով, որ դա մեծապես ազդել է թեմի բնականոն կենսագործունեության վրա: Ժողովականները քննարկեցին վերոնշյալ խնդիրը:

Սեպուհ Սրբազանը օրհնության ու գնահատանքի խոսքեր ուղղեց ԱԺ պատգամավոր Կարեն Կարապետյանի որդուն` Վահե Կարապետյանին` Գուգարաց թեմի քահանայից դասին ցուցաբերած ֆինանսական աջակցության համար: Հոգևոր դասը նույնպես իր երախտագիտությունը հայտնեց՝  բարեմաղթանքներ հղելով Վ. Կարապետյանին: 

Մարզպետ Արթուր Նալբանդյանը, ծանոթանալով թեմի նյութական կացությանը, խոստացավ համայնքապետերի հետ հանդիպումներին քննարկել այս հարցերը և ճգնաժամից դուրս գալու ելքեր գտնել: