Լոռու մարզպետի աշխատակազմ

 Փետրվարի 23-ին տեղի ունեցավ Թումանյան խոշորացված  քաղաքային  համայնքի ավագանու առաջին նիստը, որը վարում էր նորընտիր քաղաքապետ Լևոն Զավարյանը: Նիստին ներկա էին նաև Լոռու մարզպետ Արթուր Նալբանդյանը, փոխմարզպետ Արսեն Դարբինյանը, մարզպետարանի ՏԻ և ՀԳՄ հարցերով վարչության պետ Դավիթ Մանուչարյանը, մարզպետարանի պատասխանատու աշխատողներ:

 Ներկաներին ողջունեց և  նորընտիր ավագանու անդամներին շնորհավորեց Լ. Զավարյանը: Խոշորացված համայնքների բնակչությանը շնորհակալություն հայտնելով վստահության համար՝  նա պատրաստակամություն հայտնեց գործել ի շահ համայնքի կայացման և զարգացման:  Այնուհետև, ավագանու անդամները երդվեցին իրենց գործունեության ընթացքում առաջնորդվել ՀՀ Սահմանադրությամբ, օրենքներով, անշեղորեն կատարել  իրենց պարտականությունները և գործել ի նպաստ համայնքի զարգացման և բարօրության:

Նրանց շնորհավորեց նաև Արթուր Նալբանդյանը:  Նա իր ողջույնի խոսքում նշեց, որ համայնքների խոշորացման ծրագրի շուրջ քննարկումները կառավարությունում  սկսվել են դեռևս տարիներ առաջ, հաշվի են առնվել բոլոր ռիսկերը ու վերջապես որոշում է կայացվել գնալ այդ պատասխանատու  քայլին:

-Եվրոպական զարգացած երկրներն արդեն մի քանի անգամ համայնքների խոշորացում են իրականացրել: Սա ինքնանպատակ քայլ չէ, այլ ենթադրում է ռեսուրսների կենտրոնացում և կառավարման արդյունավետ համակարգի ներդրում: Ձեր աշխատանքը պետք է լինի թափանցիկ ու տեսանելի, կառավարումը՝ մասնակցային. սա է լինելու մեր  գլխավոր պահանջը:  Որպես տարածքային կառավարում իրականացնող մարմին՝ մենք մեր հերթին, պարտավորվում ենք աջակցել և սատարել ձեզ,- ասաց մարզի ղեկավարը նաև վստահեցնելով, որ ՀՀ կառավարության և տարբեր միջազգային կառույցների աջակցությամբ տարածաշրջանում բազմաթիվ  զարգացման ծրագրեր կիրականացվեն:

 Ա. Նալբանդյանը  շնորհակալություն հայտնեց  COAF կազմակերպությանը ավագանու  նիստերի անցկացման  տարածքը  վերանորոգելու համար:

Օգտվելով առիթից, ավագանու անդամները, հարցեր ուղղեցին մարզպետին՝ ստանալով սպառիչ պատասխաններ: