Տեղեկատվական կենտրոն
Նորություններ
Ամենայն Հայոց բանաստեղծի ծննդյան օրը՝ Զորյանի հարկի տակ
19.02.2016
Թումանյանական օրվա կապակցությամբ գրական-երաժշտական միջոցառում էր կազմակերպվել Վանաձորի Ստեփան Զորյանի տուն-թանգարանում: Ամենայն հայոց բանաստեղծ Հովհաննես Թումանյանի ծննդյան օրվա առթիվ Զորյանական հարկի տակ հյուրընկալվել էին Լոռու մարզպետ Արթուր Նալբանդյանը, մարզպետարանի կրթության, մշակույթի և սպորտի վարչության պետ Մինաս Սայադյանը, Վանաձորի պետական համալսարանի ռեկտոր Գուրգեն Խաչատրյանը, Վանաձորի Սուրբ Գրիգոր Նարեկացի եկեղեցու հոգևոր հովիվ տեր Վահան քահանա Ազարյանը, մտավորականներ, աշակերտներ, հյուրեր: Թանգարանի տնօրեն, բանաստեղծուհի Լենա Անթառանյանը, ջերմորեն ողջունելով հյուրերին, առաջարկեց հնչեցնել Մեծն Թումանյանի քառյակներից: Ներկաները, մեկը մյուսին հերթ չտալով, ասմունքում էին թումանյանական քառյակները՝ մեկ անգամ ևս հավաստելով, որ դրանք, ինչպես նաև Թումանյանի ողջ գրականությունը հավերժական արժեքներ են: Զորյանական հյուրընկալ օջախն ամբողջությամբ Թումանյանով էր շնչում. հնչեցին ասմունք, նրա խոսքերով գրված երգերի կատարումներ, ներկայացվեցին թատերականացված տեսարաններ:
Փետրվարի 19-ը 2008 թվականից ի վեր Հայաստանում նշվում է նաև որպես Գիրք նվիրելու օր: Այդ առիթով մարզի ղեկավարը ներկաներին նվիրեց Թումանյանի քառյակների ժողովածուն: