Տեղեկատվական կենտրոն
Նորություններ
Հաշվետվությամբ հանդես եկավ Վանաձորի բժշկական կենտրոնի տնօրենը
17.02.2016
Լոռու մարզպետի հանձնարարությամբ տարեկան ամփոփիչ հաշվետվություններով հանդես են գալիս նաև մարզի բժշկական կենտրոնների տնօրենները:
Փետրվարի 17-ին Լոռու մարզպետ Արթուր Նալբանդյանը, մարզպետարանի առողջապահության և սոցիալական ապահովության վարչության պետ Սամվել Լամբարյանը լսեցին Վանաձորի բժշկական կենտրոնի տնօրեն Վարդան Աբովյանի հաշվետվությանը: Նա իր զեկուցման մեջ նշեց, որ հաշվետու տարում բժշկական կենտրոնում բժշկական օգնություն է ստացել 10341 (2014թ.՝ 10 743 ) մարդ, որոնցից թերապևտիկ բաժանմունքում՝ 3609 հիվանդ, վիրաբուժական բաժանմունքում՝ 1449 (վիրահատվել է՝ 2644 մարդ), մանկական վիրաբուժական բաժնում՝ 635 երեխա (վիրահատվել է 290-ը), ամբուլատոր սպասարկվել է 834 երեխա, մանկական սոմատիկ բաժանմունքում՝ 1501 հիվանդ, ուռուցքաբանական բաժանմունքում՝ 274, հեմոդիալիզի բաժանմունքում՝ 54, վնասվածքաբանական ամբուլատոր ծառայությունում օգնություն է ստացել 1471 հիվանդ, մանկաբարձա-գինեկոլոգիական բաժանմունքում՝ 2844 կին: 2015թ. ծնվել է 1394 երեխա ( 200-ով պակաս, քան 2014թ.): Շտապ օգնության կայանում սպասարկվել է 19 071 կանչ:
Մարզի այլ քաղաքներից և գյուղական բնակավայրերից Վանաձորի ԲԿ է դիմել 3064 մարդ: Իրականացվել են ռետգեն ախտորոշիչ՝ 10 424, ամբուլատոր՝ 3417, գերձայնային՝ 17521, էնդոսկոպիկ՝ 341, լաբորատոր՝ 377 612, այդ թվում՝ ամբուլատոր և տնային՝ 44 433 հետազոտություններ:
-Վանաձորի բժշկական կենտրոնի հիմնական նպատակն է յուրաքանչյուր հիվանդի մատուցել որակյալ և անվտանգ բժշկական ծառայություն: Այս նպատակին հասնելու համար աշխատել ենք մի քանի ուղղություններով` կադրային ռեսուրսի հզորացում, հագեցում սարքավորումներով, աշխատանքային պայմանների բարելավում, կառավարման համակարգի բարեփոխում,-ասաց բուժհաստատության տնօրենը՝ ներկայացնելով նաև, թե ինչ աշխատանքներ են կատարվել նշված ուղղություններով:
Բժշկական կենտրոնում աշխատում է 470 մասնագետ` 96 բժիշկ և 223 բուժքույր, 86 մայրապետ:
Բժշկական կենտրոնը համալրվել է նոր մասնագետներով: 2015թ.-ի ընթացքում աշխատանքի է ընդունվել 4 բժիշկ՝ նյարդավիրաբույժ, վնասվածքաբան, վիրաբույժ, հեմոդիալիզի բժիշկ: Որպես խորհրդատու՝ ընդունվել է նաև պլաստիկ միկրովիրաբույժ: Իր դիմումի կամ կենսաթոշակի անցնելու կապակցությամբ աշխատանքից ազատվել է 24 մարդ:
2015թ.-ին վերանորոգվել են բժշկական կենտրոնի կաթսայատունը, լվացքատունը, հիմնական մասնաշենքի ջրագծերը, փոխվել է շտապ օգնության ծառայության մասնաշենքի ջրագիծը: Վերանորոգվել է նաև նախորդ տարեվերջին ուժեղ քամու հետևանքով վնասված տանիքը:
Նախորդ տարվա ընթացքում ձեռք են բերվել բուժհաստատությանն անհրաժեշտ սարքավորումներ՝ վիդեոգաստրոսկոպիկ և վիդեոկոլոնոսկոպիկ համալիր, 2 մոնիտոր, ուլտրաձայնային ինհալյատոր, 2 ԷՍԳ ապարատ, վիրաբուժական էլեկտրադանակ, վենէքստրակտոր հավաքածու, համակարգչային տեխնիկա: Ըստ տնօրենի, բուժհաստատությանը, սակայն, դեռևս խիստ անհրաժեշտ է համակարգչային տոմոգրաֆի էկրան, հեմոդիալիզի սարք: 2015թ. լավագույն ձեռքբերումը լապարասկոպիկ վիրահատությունների տեխնոլոգիայի ներդրում է Վանաձորի ԲԿ-ում:
Նախորդ տարի ևս շարունակվել են կառավարման համակարգի բարեփոխումները: Հաշվետու ժամանակահատվածում պատշաճ կարգով իրականացվել են ներհիվանդանոցային վարակների կանխարգելմանն ուղղված աշխատանքներ, որի իրականացման համար հատկացվել է ավելի քան 9 մլն 450 հազար դրամ: Կենտրոնում իրականացվել են նաև կանխարգելիչ միջոցառումներ:
Հաշվետու ժամանակահատվածում բժշկական կենտրոնում անց է կացվել միջին բուժանձնակազմի ուսուցում:
Անդրադառնալով ֆինանսական հոսքերին՝ տնօրենը նշեց, որ նախորդ տարի վճարովի ծառայությունների մուտքերը կազմել են 258 մլն 254 հազար դրամ, 12 մլն-ով ավելի, քան 2014թ.-ին:
Մարզպետը շնորհակալություն հայտնեց բժշկական կենտրոնի տնօրենին և ողջ անձնակազմին ծանրաբեռնված և պատասխանատու աշխատանքի համար:
Նշելով, որ 2016թ.-ին ևս մարտահրավերներն ու խնդիրները քիչ չեն լինելու՝ նա հորդորեց աշխատանքներում առավել հետևողական լինել:
-Բուժծառայությունների որակի բարձրացմանն ուղղված հետևողական քայլերին զուգահեռ մեզ համար պակաս կարևոր չէ բուժաշխատող-հիվանդ հարաբերությունները բարձր մակարդակի հասցնելու գործընթացը: Յուրաքանչյուր դժգոհություն քաղաքացիների կողմից անհետևանք չի մնալու: Մեզ համար կարևոր է նաև ստվերային երևույթների բացառումը, վճարովի ծառայությունների ավելացումը,- ասաց մարզի ղեկավարը:
Վերջինիս հարցեր ուղղվեցին մասնագետ-կադրերի պակասի հետ կապված:
Ա. Նալբանդյանը նշեց, որ մարզպետարանի առողջապահության և սոցիալական ապահովության վարչությունը Առողջապահության նախարարության և մարզի բժշկական կենտրոնների հետ համատեղ հետևողական աշխատանքներ է կատարում այդ խնդրին լուծում տալու համար: