Լոռու մարզպետի աշխատակազմ

Տարիներ առաջ գործազուրկների համար գոնե ժամանակավոր զբաղվածություն ապահովելու, նրանց սոցիալական վիճակը որոշակիորեն բարելավելու, ինչպես նաև համայնքներում հրատապ աշխատանքներ իրականացնելու նպատակով, հանրապետության մի շարք մարզերում, այդ թվում և Լոռու մարզում, պետական ֆինանսավորմամբ իրականացվում էին վարձատրվող  հասարակական աշխատանքների ծրագրեր: Շուրջ 5 տարվա ընդմիջումից հետո 2016թ. զբաղվածության ամենամյա պետական ծրագրի շրջանակներում ներդրվել է Վարձատրվող հասարակական աշխատանքների կազմակերպման միջոցով գործազուրկների ժամանակավոր զբաղվածության ապահովման փորձնական ծրագիր:

Տարվա ընթացքում հանրապետության մարզերում կիրականացվի նման 30 ծրագիր, որից 4–ը Լոռու մարզում՝ 6 մլն դրամ ընդհանուր ֆինանսավորմամբ:

Լոռու մարզպետի 10.02.2016թ. որոշմամբ ստեղծվել է զբաղվածության աջակցության մարզային հանձնաժողով՝ մարզպետի տեղակալ Արսեն Դարբինյանի նախագահությամբ:

Փետրվարի 12-ին տեղի ունեցավ հանձնաժողովի առաջին նիստը, որին մասնակցում էին նաև շահառու համայնքների  ներկայացուցիչներ:

Ա.Դարբինյանը, հանձնաժողովի նախագահի տեղակալ Արա Առաքելյանը, հանձնաժողովի քարտուղար Վալերի Ջաղինյանը պարզաբանումներ տվեցին ծրագրի վերաբերյալ՝ նշելով, որ ժամանակավոր այդ աշխատանքներում ներգրավվելու համար գերապատվություն է տրվելու սոցիալապես առավել կարիքավոր անձանց, այդ թվում՝ ընտանիքում երկու և ավելի անչափահաս կամ հաշմանդամ ունեցող քաղաքացիներին և այլն: Աշխատանքները օրավարձային են՝ օրական 5 հազար  դրամ հաշվարկով:

Արսեն Դարբինյանը հանձնաժողովի անդամներին հորդորեց ծրագրերի քննարկման ժամանակ լինել ուշադիր և նախապատվություն տալ առավել կարևորություն և հրատապություն ներկայացնող այնպիսի աշխատանքներին,  որոնք հնարավոր կլինի ավարտել մեկ ծրագրի ընթացքում:

Նախնական քննարկմամբ 2016թ. ծրագրին մասնակցելու  հայտ  ներկայացրած համայնքներից ընտրվել են Վանաձորը, Փամբակը, Շահումյանը, Ձորագետը, Մեծ Պարնին և Գարգառը:

Հանձնաժողովի անդամները սպառիչ պատասխաններ տվեցին համայնքների ներկայացուցիչներին հուզող հարցերին:

Գործնական քննարկման արդյունքում ներկայացված ծրագրերը հաստատվեցին հանձնաժողովի կողմից: