Տեղեկատվական կենտրոն
Նորություններ
Կարևորվեց համագործակցությունը մարզպետարանի, ՏԻՄ կառույցների և ոստիկանության միջև
10.12.2015
ՀՀ Ոստիկանություն-մարզպետարան- ՏԻՄ ծրագրային համագործակցության շրջանակներում դեկտեմբերի 10-ին տեղի ունեցավ խորհրդակցություն Լոռու մարզպետարանի ստորաբաժանումների պետերի, մարզի խոշոր համայնքների ղեկավարների և ՀՀ ոստիկանության Լոռու մարզային վարչության ներկայացուցչի մասնակցությամբ: Խորհրդակցությունը վարում էր Լոռու մարզպետի տեղակալ Արսեն Դարբինյանը, ով ներկաներին տեղեկացրեց, որ հանդիպման թեման ամանորյա տոնակատարության նախապատրաստության և անցկացման ընթացքում հասարակական կարգի պահպանմանն ուղղված խնդիրներն են:
Այդ հարցերի շուրջ իր նկատառումներն արտահայտեց ՀՀ ոստիկանության Լոռու մարզային վարչության պետի տեղակալ, ոստիկանության փոխգնդապետ Արա Կարապետյանը: Նախ նշվեց, որ պետական կառավարման, ՏԻՄ մարմինների, ուսումնական հաստատությունների, հասարակական և այլ կազմակերպությունների հետ նմանօրինակ հանդիպումներ կազմակերպվում են յուրաքանչյուր եռամսյակ, որը տեսանելի արդյունքներ է տալիս հասարակական կարգի և օրինականության պահպանման իրավիճակի բարելավման գործում: Նկատի առնելով ամանորյա տոնակատարությունների մոտալուտ լինելը՝ նա ներկաների ուշադրությունը հրավիրեց այս օրերին ակտիվացող փողոցային առևտրի, հատկապես՝ հրատեխնիկայի վաճառքի օրինականության պահպանմանը, դժբախտ դեպքերի ու անցանկալի պատահարների կանխարգելման խնդրին: Նա կարևորեց հատկապես զանգվածային լրատվամիջոցներով ազգաբնակչության շրջանում բացատրական աշխատանքների իրականացումն ու ակտիվ քարոզչությունը:
Խորհրդակցության մասնակիցների կողմից եղան առաջարկություններ՝ նախատոնական և տոնական օրերին տրանսպորտային երթևեկության կանոնակարգումն ակտիվացնելու, հանրության ազատ տեղաշարժը չխոչընդոտելու միջոցառումներ իրականացնելու վերաբերյալ:
Ամփոփելով խորհրդակցությունը՝ Ա. Դարբինյանը ՏԻՄ ներկայացուցիչներին հորդորեց ուշադրության կենտրոնում պահել հատկապես եղևնիների ապօրինի հատումների կանխարգելումը և հակահրդեհային միջոցառումների կազմակերպումը: