Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
«Ոսկե աշուն» երիտասարդական փառատոնը կայացավ
25.11.2015
Ավանդական դարձած «Ոսկե աշուն» երիտասարդական փառատոնը Լոռու մարզի երիտասարդության համար դարձել է սիրելի և սպասելի միջոցառում: Այդ է վկայում նաև տարեցտարի մասնակիցների թվի ավելացումը: Սա մի հարթակ է, որի միջոցով ասպարեզ են ելնում արվեստի ու մասնավորապես՝ երաժտարվեստի բնագավառում իրենց կարողությունները դրսևորել ցանկացող բազմաթիվ կատարողներ: Միջոցառումը կազմակերպվում է «Հայաստանի Երիտասարդական հիմնադրամի» Լոռու մարզային կենտրոնի կողմից: Այս տարի փառատոնի կազմակերպմանն աջակցել էր նաև Լոռու մարզպետարանը՝ ի դեմս մարզպետ Արթուր Նալբանդյանի:
Նոյեմբերի 24-ին Վանաձորի Հովհաննես Աբելյանի անվան պետական դրամատիկական թատրոնի դահլիճում տեղի ունեցավ փառատոնի գալա- համերգը և մրցանակաբաշխությունը: Ներկա էր նաև մարզի ղեկավարը:
Ա. Նալբանդյանն իր ողջույնի խոսքում շնորհակալություն հայտնեց միջոցառման կազմակերպիչներին և բոլոր աջակիցներին՝ երիտասարդներին մաղթելով պայծառ ու լուսավոր ապագա:
- Սերունդների համար ամենացանկալի ժամանակը եղել և մնում է ապագան: Յուրաքանչյուր նոր սերունդ ապագայի քաղաքացի է, և մենք, սերնդեսերունդ, ձգտում, ջանք ենք ներդնում, որ ապագան լինի է՛լ ավելի լավը, է՛լ ավելի հզոր հայրենիքով, խաղաղ երկնքով ու բարեկեցիկ կյանքով: Մենք՝ մեծահասակներս, վստահ ենք, որ դուք այդպիսի երկրի տերն ու քաղաքացին եք լինելու: Ես կցանկանայի, որ միմյանց նկատմամբ տածած ձեր ջերմությունը, համախմբվածությունն ու միասնականությունը պահպանվեր նաև տոնահանդեսից հետո: Միասնականությունը չի ժխտում անձնական կարծիք ունենալու, կամք դրսևորելու իրավունքը, այն ավելի շուտ ցանկալի նպատակին հասնելու գործում ուժերի և հնարավորությունների միատեղում է: Ոչ ոք չի կարող վիճարկել, որ համախմբվածությունն է ծնում ուժ, դառնում մեր բոլոր հաղթանակների գրավականը,-ասաց նա:
Փառատոնի լավագույն մասնակիցները, պարային խմբերը հանդես եկան երգերի և պարային կատարումներով՝ բազմաթիվ հաճելի պահեր պարգևելով հանդիսատեսին: Առաջին մրցանակի արժանացած երիտասարդներին մրցանակները հանձնեց մարզի ղեկավարը, երկրորդ տեղերը զբաղեցրածներին՝ փոխմարզպետ Տիգրան Բադոյանը և երրորդ՝ «Հայաստանի Երիտասարդական հիմնադրամի» Լոռու մարզային կենտրոնի ղեկավար Վահե Դոխոյանը: Նա փառատոնին աջակցելու համար շնորհակալագիր և հուշանվեր հանձնեց Արթուր Նալբանդյանին:
