Լոռու մարզպետի աշխատակազմ

Սեպտեմբերի 26-ի երկուշաբթին Լոռու մարզպետի հերթական աշխատանքային խորհրդակցության օրն էր: Մինչ օրակարգային հարցերին անցնելը, մարզպետ Արթուր Նալբանդյանը ամփոփ անդրադարձավ սեպտեմբերի 20-ին  ՀՀ Նախագահ Սերժ Սարգսյանի մոտ Լոռու մարզպետի և մարզպետարանի պատասխանատուների մասնակցությամբ անցկացված խորհրդակցությանը՝ նվիրված Լոռու մարզի 2014թ. և 2015թ. առաջին կիսամյակի սոցիալ-տնտեսական իրավիճակին, առկա հիմնախնդիրներին և զարգացման ծրագրերին:

-Իհարկե հանրապետական ու տեղական լրատվամիջոցներն ընդհանուր գծերով անդրադարձել են հանդիպման ընթացքում քննարկված  հիմնախնդիրներին, սակայն կցանկանայի որոշ մանրամասներ ներկայացնել ձեր ուշադրությանը,-ասաց Ա. Նալբանդյանը:

Մարզի ղեկավարը մասնավորապես խոսեց «Վանաձոր-քիմպրոմ» ընկերության հետագա ճակատագրին առնչվող հարցերի մասին, նշելով, որ բացի աշխատավարձերի պարտքերի մարման խնդրից, երկրի  նախագահը շահագրգիռ է հնարավոր բոլոր  միջոցներով, օրինակ, վերապրոֆիլավորման ճանապարհով ձեռնարկությունը պահպանելու, այն աշխատատեղերով համալրելու հարցում:

Մարզպետը  մանրամասներ ներկայացրեց տնտեսական զարգացման մի շարք ոլորտներում՝ արդյունաբերություն, գյուղատնտեսություն, առողջապահության, զբոսաշրջություն, գիտատեխնիկական վերջին նվաճումներին համահունչ տեխնոլոգիաների ներդրում, քաղաքաշինություն և այլն,  կատարվելիք ակնառու ծրագրերի մասին: Նշեց, որ 2015  թվականի ավարտին վերջնականապես կլուծվի Վանաձոր և Սպիտակ քաղաքների, իսկ  մինչև 2016թ. ավարտը՝ մարզի  մյուս բնակավայրերում երկրաշարժից տուժած ընտանիքներին բնակարանով ապահովման  խնդիրը:

Աննախադեպ միջոցներ են  ներդրվել և առաջիկայում էլ  ներդրվելու  են մարզի միջպետական ու միջհամայնքային ճանապարների(Վանաձոր-Բագրատաշեն, Տաշիր-Գոգավան, Ստեփանավան-Յաղդան-Օձուն) ու  դրանց կոմունիկացիաների շահագործման համար:

 Այնուհետև խորհրդակցությունն ընթացավ ըստ օրակարգի: Լոռու մարզի փրկարարական վարչության ՃԿԿ պետ Արթուր Չատինյանը տեղեկացրեց, որ շաբաթվա ընթացքում ստացվել է հրդեհների, ճանապարհատրանսպորտային պատահարների, կենցաղային կանչերի և այլ  բնույթի 15 ահազանգ, բարեբախտաբար՝  առանց մարդկային կորուստների: Որպես հաճելի  նորություն՝ ՃԿԿ պետը հայտնեց, որ  իրենց  աշխատակից Մխիթար  Հարությունյանը հաշմանդամների  բազկամարտի միջազգային մրցույթում զբաղեցրել է  մրցանակային տեղ:

Մարզպետարանի ֆինանսական և սոցիալ-տնտեսական զարգացման վարչության  պետ Հրայր Պապոյանը ներկայացրեց սեփական եկամուտների հավաքագրման ցուցանիշները հոկտեմբերի 23-ի դրությամբ: Այն կազմում է  ընդամենը 41.2 տոկոս: Ամսվա ավարտին մնացել է  մեկ աշխատանքային շաբաթ, սակայն 110  մլն  դրամ պետք է  հավաքագրվի: Ցուցանիշը, բնականաբար, մարզի  ղեկավարին  չգոհացրեցին և նա մարզպետի տեղակալներին, ոլորտի պատասխանատուներին հանձնարարեց շաբաթվա ընթացքում խստորեն վերահսկել սեփական եկամուտների հավաքագրման ընթացքը:

Իրենց ղեկավարած ոլորտների վերաբերյալ  տեղեկատվություններ  ներկայացրին  նաև մարզպետարանի մյուս ստորաբաժանումների պատասխանատուները:

Վերջում մարզպետ Ա. Նալբանդյանը շնորհավորեց Արամայիս Հակոբյանին Լուսաղբյուր համայնքի ղեկավարի ընտրություններում բացահայտ  առավելությամբ հաղթելու կապակցությամբ, մաղթեց աշխատանքային  հաջողություններ: