Լոռու մարզպետի աշխատակազմ

Վանաձորում ավարտվեցին  նախազորակոչային և զորակոչային տարիքի երիտասարդների հանրապետական ռազմամարզական խաղերը: Նպատակը`  հայրենիքի պաշտպանությանը  պատրաստ և ՀՀ զինված ուժերում ծառայելու համար ֆիզիկապես կոփված երիտասարդների դաստիարակումն էր, առողջ ապրելակերպի  ամրապնդումը: Ռազմամարզական խաղերի նախապատրաստման և անցկացման աշխատանքները համակարգում է ՀՀ սպորտի և երիտասարդության հարցերի նախարարությունը:

Այս տարվա խաղերը, որին  մասնակցում էին  մարզի 5 տարածաշրջաններից 2-ական թիմեր, նվիրված էին Հայրենական մեծ պատերազմում տարած հաղթանակի 70-ամյակին: Դրանք անցկացվում են 4 փուլով՝  ներդպրոցական, տարածաշրջանային,  մարզային և հանրապետական: Ռազմամարզական խաղերի ծրագրում ներառված են հետևյալ մարզաձևերը՝ նռնակի նետում, փոխանցումավազք, ձգում պտտաձողից, կրոսավազք, հրաձգություն, ինքնաձիգի քանդում և  հավաքում:

- Այս կերպ մենք հայոց բանակի շարքերը համալրում ենք ֆիզիկապես կոփված և գիտակից երիտասարդներով: Աշակերտները, դպրոցում զբաղվելով նման ռազմամարզական մրցումներով, ձեռք են բերում համապատասխան հմտություն, փորձ, որը հետագայի համար, որպես մեր բանակի ապագա զինվորներ, շատ կարևոր է,- ասում է Լոռու մարզպետարանի կրթության, մշակույթի և սպորտի վարչության  մշակույթի և սպորտի բաժնի պետ Արամ Ռևազյանը:

Խաղերի մարզային փուլի հաղթող Վանաձորի թիվ 13 ավագ դպրոցը  նոյեմբերի 2-5-ը  կմասնակցի Վազգեն Սարգսյանի անվան ռազմական ինստիտուտում կայանալիք հանրապետական եզրափակիչ փուլին: