Տեղեկատվական կենտրոն
Նորություններ
Լոռու մարզը մասնակցել է «ԱրմՊրոդԷքսպո» միջազգային մասնագիտացված ամենամյա ցուցահանդեսին
19.10.2015
2011 թ. սկսած ՀՀ կառավարության որոշմամբ հոկտեմբերի երրորդ կիրակին Հայաստանում նշվում է որպես Գյուղատնտեսության աշխատողի օր և այդ օրվան ընդառաջ ՀՀ գյուղատնտեսության նախարարության նախաձեռնությամբ հոկտեմբերի 16-18-ը Երևանում կազմակերպվել էր «ԱրմՊրոդԷքսպո» միջազգային մասնագիտացված ամենամյա ցուցահանդեսը և «Հայագրոֆորում» համաժողովը: «ԱրմՊրոդԷքսպո» միջազգային մասնագիտացված ցուցահանդեսին ընդհանուր առմամբ մասնակցել է ավելի քան 80 ընկերություն Հայաստանից և Արցախից:
Միջոցառումներին մասնակցել և «ԱրմՊրոդԷքսպո» ցուցահանդեսին Լոռու մարզի գյուղատնտեսական տաղավարը ներկայացրել է ՀՀ Լոռու մարզպետ Արթուր Նալբանդյանը: Լոռու մարզի տաղավարում ներկայացված էին մարզում արտադրվող գյուղատնտեսական արտադրատեսակները` կաթնամթերք, մսամթերք, միրգ, բանջարեղեն, ավանդական մշակաբույսեր, անուշեղեն, պահածոներ և այլ մթերքներ: Հետաքրքիր ձևավորումներով ցուցադրվեցին ազգային կերակրատեսակները, կոլորիտային երանգավորմամբ պատկերները:
Ցուցահանդեսի առաջին օրը Լոռու մարզպետը տաղավարում դիմավորել է ՀՀ վարչապետ Հովիկ Աբրահամյանին և ներկայացրել գյուղատնտեսության ոլորտում մարզի այս տարվա ձեռքբերումները: Նա նշել է, որ պետական աջակցությամբ իրականացվող գյուղատնտեսական ծրագրերի շնորհիվ մարզում ցանքատարածություններն ավելացել են 3000 հեկտարով, բերքատվությունը ևս ավելացել է:
Մարզի ներկայացուցիչները մասնակցել են նաև «Հայագրոֆորում» համաժողովին:
Գյուղատնտեսության զարգացման գործում ունեցած նշանակալի ավանդի և բեղմնավոր աշխատանքի համար ՀՀ գյուղնախարարության «Գյուղատնտեսական նվաճումների համար» ոսկե մեդալով պարգևատրվել է Լոռու մարզի Փամբակ համայնքի ներկայացուցիչ Արտաշես Սարոյանը (տավարաբույծ): Գյուղնախարարի պատվոգրին արժանացան Կարմիր Աղեգի համայնքի ներկայացուցիչ Վաչագան Հովհաննիսյանը (անասնաբուծություն, հողագործություն) և «Ռոսֆրուտ» ՍՊԸ-ն (մրգի և բանջարեղենի մշակում): Իսկ Սարալանջ համայնքի մեղվաբույծ Ռազմիկ Զաքարյանը պարգևատրվեց Մեղվաբույծների միության «Ոսկե մեդալով»: