Տեղեկատվական կենտրոն
Նորություններ
Աշխատանքային խորհրդակցություն
19.10.2015
Հոկտեմբերի 19-ին, Լոռու մարզպետ Արթուր Նալբանդյանը փոխմարզպետների, մարզպետարանի աշխատակազմի ստորաբաժանումների պետերի մասնակցությամբ անցկացրեց հերթական աշխատանքային խորհրդակցությունը:
Լոռու մարզի փրկարարական վարչության պետի տեղակալ, ՃԿԿ պետ Արթուր Չատինյանը ներկայացրեց անցած մեկ շաբաթում մարզի տարածքում գրանցված արտակարգ դեպքերը: Ըստ նրա, նշված ժամանակահատվածում գրանցվել է 11 դեպք, որից 4-ը հրդեհի (մահվան 1 դեպք), 1-ը՝ ՃՏՊ՝ 5 վիրավորով, 1-ը՝ թունավարման, 5-ը՝ կենցաղային բնույթի:
Մարզպետարանի ֆինանսական և սոցիալ-տնտեսական զարգացման վարչության պետ Հրայր Պապոյանը ներկայացրեց սեփական եկամուտների հավաքագրման ցուցանիշները հոկտեմբերի 16-ի դրությամբ: Նրա տեղեկացմամբ՝ սեփական եկամուտների պլանի կատարողականը ամսվա պլանի նկատմամբ տվյալ ժամանակահատվածում կազմել է 29,6 տոկոս, գույքահարկինը՝ 33,4 և հողի հարկի կատարողականը՝ 25,6 տոկոս: Մարզի ղեկավարին հատկապես մտահոգեց, որ տվյալ ժամանակահատվածում սեփական եկամուտների գծով ընդհանրապես հավաքագրում չունի՝ 3 և հողի հարկի գծով՝ 26 համայնք:
-Հարկերի հավաքագրումը համայնքների ղեկավարների համար պետք է լինի ամենօրյա աշխատանք, մինչդեռ որոշ համայնքներում հարկերը հավաքագրվում են ամսվա մեջ միայն մեկ օր և այն էլ՝ նպաստների և կենսաթոշակների բաշխման օրերին, ինչն անթույլատրելի է,- ասաց մարզպետը՝ փոխմարզպետներին և համապատասխան վարչությունների պետերին հանձնարարելով հետևողական աշխատանք իրականացնել այս ուղղությամբ:
Մարզպետարանի մյուս ստորաբաժանումների պետերը ևս տեղեկատվություն ներկայացրին ընթացիկ աշխատանքների մասին, հանդես եկան առաջարկություններով:
Ա. Նալբանդյանը մարզպետարանի աշխատակազմի կրթության, մշակույթի և սպորտի վարչությանը, տեղեկատվության և հասարակայնության հետ կապերի բաժնին հանձնարարեց Ուսանողների միջազգային օրվան ընդառաջ միջոցառումների ծրագիր մշակել: