Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Միջազգային օրվա կապակցությամբ տարեցներին հյուրընկալվեցին Լոռու մարզպետն ու փոխմարզպետը
01.10.2015
Տարեցների միջազգային օրվա կապակցությամբ, ավանդույթի համաձայն, Լոռու մարզպետ Արթուր Նալբանդյանն այցելեց մարզի ամենաերկարակյաց տարեցին՝ Վանաձորի 105-ամյա բնակչուհի Ազգանուշ Հովհաննիսյանին՝ անձամբ իր շնորհավորանքի ու բարեմաղթանքի խոսքերը հղելու նրան: Մարզի ղեկավարին ուղեկցում էին Լոռու մարզպետի տեղակալ Տիգրան Բադոյանը, մարզպետարանի պատասխանատու աշխատակիցներ: Հանդիպումը ջերմ ու սրտառուչ էր: Ա. Նալբանդյանը շնորհավորագիր, նվերներ և դրամական պարգև հանձնեց մարզի մայրապետին:
Տատիկը պատառիկներ պատմեց իր բազմափորձ կյանքից՝ խաղաղություն բարեմաղթելով աշխարհին, երիտասարդներին հորդորեց ամուր և աննահանջ կանգնել հայրենի հողի վրա:
Տարեցների միջազգային օրվա կապակցությամբ այց կատարվեց նաև Վանաձորի ծերատուն: Արթուր Նալբանդյանն, այստեղ ևս, ձեռնունայն չէր այցելել: Նա ծերատանը հեռուստացույց նվիրեց: Հյուրընկալները խնջույքով նշեցին իրենց տոնը: Գեղարվեստական կատարումներով հանդես եկան Վանաձորի Գուսան Զաքարյանի անվան թիվ 3 մշակույթի տան սաները:
Նույն օրը փոխմարզպետ Տիգրան Բադոյանը մասնակցեց նաև Լոռու մարզային գրադարանում «Հայկական Կարիտաս» բարեսիրական հասարակական կազմակերպության կողմից կազմակերպված տարեցներին նվիրված միջոցառմանը:
Փոխմարզպետը տարեցներին շնորհավորանքի և ջերմ բարեմաղթանքի խոսքեր հղեց Լոռու մարզպետի և իր անունից, իսկ կազմակերպությանը շնորհակալություն հայտնեց միայնակ տարեցներին աջակցելու նպատակով իրականացվող բազմաբնույթ ծրագրերի համար: Ողջույնի խոսք հղեցին, կազմակերպության գործունեությունը կարևորեցին նաև Լոռու մարզպետարանի առողջապահության և սոցիալական ապահովության վարչության սոցիալական ապահովության բաժնի պետ Վալերի Ջաղինյանը, «Հայկական Կարիտասի» «Տնային խնամք միայնակ ծերերին» ծրագրի ղեկավար Ֆլորա Սարգսյանը:
