Տեղեկատվական կենտրոն
Նորություններ
Աշխատանքային խորհրդակցություն
07.07.2015
Հուլիսի 7-ին Լոռու մարզպետի հերթական խորհրդակցության օրն էր: Ֆինանսական և սոցիալ-տնտեսական զարգացման վարչության պետ Հրայր Պապոյանը ներկայացրեց մարզի համայնքներում անցած 6 ամիսներին սեփական եկամուտների հավաքագրման իրավիճակը: Թեև ընդհանուր առմամբ սեփական եկամուտների հավաքագրումը մարզում 2.8 տոկոսով կամ մոտ 21 մլն դրամով թերակատարվել է, սակայն նախորդ տարվա համեմատությամբ ավելի քան 19 մլն դրամի հավաքագրման աճ կա: 27.7 մլն դրամով գերակատարվել է գույքահարկի կիսամյա առաջադրանքը: Չորս հարկատեսակների գծով էլ՝ հողի հարկ, տեղական և պետական տուրքեր, հողի վարձակալության վճարներ, թեև աննշան չափով, թերացում է արձանագրվել: Մարզպետ Արթուր Նալբանդյանը փոխմարզպետներին և համապատասխան ստորաբաժանումների ղեկավարներին վերստին հրահանգեց ամենօրյա ուշադրության կենտրոնում պահել սեփական եկամուտների հավաքագրման գործընթացը` դրանց անվերապահ կատարման պայմանով:
Քննարկում ծավալվեց մարզում իրականացվող և նոր մեկնարկելիք կառուցողական ծրագրերի շուրջ: Թեև այս տարի էականորեն նվազել են պետբյուջեից հրատապ ծրագրերին ուղղված ֆինանսական հատկացումների ծավալները, սակայն, մարզպետի հավաստմամբ, մեծածավալ աշխատանքներ կիրականացվեն այլ տարբեր ներդրումային ծրագրերով:
-Առաջիկա չորս տարում տարբեր միջոցներով մարզում 3 միլիարդ դրամի կառուցողական աշխատանքներ կիրականացվեն,-ասաց Ա. Նալբանդյանը, ավելացնելով, որ խելամիտ, նպատակասլաց գործելակերպի դեպքում ներդրումային մեծ ծրագրեր կարելի է բերել մարզ, որի ուղղությամբ լուրջ աշխատանքներ են իրականացվում:
Այս առումով մարզպետը մասնավորապես կարևորեց երկու խոշորագույն ծրագրերի՝ Վանաձոր-Բագրատաշեն միջպետական և Ստեփանավան-Օձուն միջհամայնքային ավտոճանապարհների կառուցումը: Ի դեպ, առանձնահատուկ է հատկապես Ստեփանավան-Օձուն հատվածի կառուցումը. ճանապարհը բարձիթողի վիճակում է եղել խորհրդային տարիներից ի վեր:
Այնուհետև քննարկվեցին դպրոցականների ամառային հանգստին, աշնանային զորահավաքին, COAF հիմնադրամի կողմից հուլիսի 8-ին Դեբետ գյուղի մոտ կառուցվելիք
«Սմարթ» ուսումնական կենտրոնի հիմնարկեքին և այլ միջոցառումներին առնչվող հարցեր: