Տեղեկատվական կենտրոն
Նորություններ
Այցելություն կաթնամշակման ձեռնարկություն
26.06.2015
1996 թվականին Լոռու կաթնագործության երախտավորներից մեկի՝ Վոլոդյա Սարգսյանի նախաձեռնությամբ, «Դիետ» ՍՊԸ անվամբ Վանաձորում հիմնվեց կաթնամթերքի նոր արտադրություն: Շուրջ 20 տարվա ընթացքում ձեռնարկությունը ընդլայնվել է, հագեցվել ժամանակակից հոսքագծերով, տարեցտարի մեծացել է արտադրանքի ծավալը: 2014 թվականին ընկերությունը թողարկել է 80 մլն դրամի արտադրանք, նախորդ տարվանից շուրջ 18 մլն դրամով ավելի: Վանաձորի ընդհանուր արտադրանքի ծավալում ընկերության մասնաբաժինը 2.6 տոկոս է:
Հունիսի 26-ին Լոռու մարզպետ Արթուր Նալբանդյանը, մարզպետարանի մի քանի ստորաբաժանումների ղեկավարների հետ այցելեց «Դիետ» ՍՊԸ: Ընկերության նախագահ Ռուզաննա Թոթոլյանի ուղեկցությամբ մարզպետը շրջեց արտադրամասերում, ծանոթացավ աշխատանքային պայմաններին, արտադրական հնարավորություններին ու արտադրատեսակներին:
Ավանդական կաթնամթերքներից ձեռնարկությունը հիմնականում թողարկում է կաթ, թթվասեր, պանիր, կաթնաշոռ և մածուն: Ինչպես նշեցին արտադրության կազմակերպիչները, արտադրության ծավալների աճ ապահովելը գնալով դժվարանում է՝ իրացման շուկայում մրցակցության խստացման, ինչպես նաև սպառողների թվի նվազեցման հետևանքով:
Մարզպետ Ա. Նալբանդյանը դրվատեց ՍՊԸ-ի սեփականատերերին սոցիալ- տնտեսական այս բարդ պայմաններում ոչ միայն իրենց, այլև 15 աշխատակիցների ևս աշխատանքով ապահովելու, որակյալ կաթնամթերքներ արտադրելու համար: Մարզպետը պատրաստականություն հայտնեց հարկ եղած դեպքում հնարավոր բոլոր միջոցներով աջակցել և օժանդակել ձեռնարկությանը:
-Մեր մարզի պարագայում, անգամ ամենաչնչին թվով աշխատատեղ ստեղծելն ու պահպանելը գնահատելի է,-ասաց նա,- երկրի ղեկավարությունը մեզանից ակնկալում է հատկապես փոքր և միջին ձեռներեցության սատարում և մենք դա կանենք մեր հնարավորությունների սահմանում: