Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Հանդիպում դպրոցների տնօրենների հետ
20.03.2015
Լոռու մարզպետի աշխատանքային վերջին խորհրդակցություններից մեկում մարզպետը կշտամբանքով խոսեց այն դպրոցների հասցեին, որոնք վերջին երեք տարում մարզային առարկայական օլիմպիադաներին մասնակից չեն տվել: Նա կրթության, մշակույթի և սպորտի վարչության աշխատակազմին հանձնարարեց տեղերում ուսումնասիրել պատճառները, միջոցներ ձեռնարկել թերացող ուսումնական հաստատություններում կրթության և դաստիարակության դրվածքը բարելավելու համար:
Այս և ուսումնադաստիարակչական այլ խնդիրների շուրջ հանրակրթական դպրոցների տնօրենների հետ հանդիպման նպատակով մարտի 19-ին Լոռու մարզպետ Արթուր Նալբանդյանը և մարզպետարանի աշխատակազմի կրթության, մշակույթի և սպորտի վարչության պետ Մինաս Սայադյանը եղան Թումանյանի տարածաշրջանում: Ալավերդու քաղաքապետարանում տեղի ունեցած հանդիպման թեմաներն էին. մասնակցությունը դպրոցականների առարկայական օլիմպիադաներին, դպրոցների վարկանիշավորումն ու dasaran.am կայքի հետ աշխատանքը:
Կրթության վարչության պետը բարձրաձայնեց այն դպրոցների անունները, որոնք վերջին երեք տարվա ընթացքում դպրոցականների առարկայական օլիմպիադայի մարզային փուլին մասնակից չեն ապահովել:
-Սա առաջին հերթին տնօրենների ու մանկավարժների թերացումն է: Կրթության որակը գնահատվում է նաև մարզային ու հանրապետական օլիմպիադաներին աշակերտների մասնակցությամբ,- ասաց մարզի ղեկավարը, նշելով, որ որոշ դեպքերում էլ դպրոցներից անպատրաստ աշակերտներ են ուղարկում օլիմպիադաների մարզային փուլ, ինչը ևս անթույլատրելի է:
Տնօրենների հետ հանդիպման ընթացքում մարզպետը խոսեց նաև դպրոցներում տեղ գտած արատավոր երևույթների, անհարգելի բացակայությունների և ուսումնական գործընթացից դուրս մնացած երեխաների մասին: Մարզպետը տնօրեններին նաև հորդորեց դպրոցի կառավարումը դարձնել մասնակցային:
