Տեղեկատվական կենտրոն
Նորություններ
Մինչ օրս բնակարան է հատկացվել զոհված և հաշմանդամ դարձած զինծառայողների շուրջ 250 ընտանիքի
30.01.2015
Հունվարի 30-ին Լոռու մարզպետարանում անցկացվեց «Զոհված (մահացած) և հաշմանդամ դարձած զինծառայողների ընտանիքների բնակարանային պայմաններն ուսումնասիրող Լոռու մարզային հանձնաժողովի» նիստը, որը վարում էր հանձնաժողովի նախագահ, Լոռու մարզպետ Արթուր Նալբանդյանը:
Օրակարգի առաջին հարցով Ա. Նալբանդյանը ներկայացրեց հանձնաժողովի կազմը և ընթացիկ գործունեությունը, որից հետո հանձնաժողովի քարտուղար, մարզպետարանի առողջապահության և սոցիալական ապահովության վարչության սոցիալական ապահովության բաժնի պետ Վալերի Ջաղինյանը հանգամանորեն անդրադարձավ 1999-2014թ.թ. ընթացքում մարզի զոհված (մահացած) և հաշմանդամ դարձած զինծառայողների ընտանիքների բնակարանային ապահովման ուղղությամբ կատարված աշխատանքներին: Նա տեղեկացրեց, որ 1999թ.-ից մինչ օրս կառավարության աջակցությամբ և այլ միջոցներով բնակարան է հատկացվել զոհված և հաշմանդամ դարձած զինծառայողների շուրջ 250 ընտանիքի, մինչդեռ դեռևս 82 ընտանիք բնակարանի և բնակարանային պայմանների բարելավման կարիք ունի: Մարզի ղեկավարը նշեց, որ կառավարությունն ամեն կերպ փորձում է վերջնականապես լուծում տալ այս խնդրին, սակայն միջոցների սղության պատճառով գործընթացը դանդաղում է, ուստի, ըստ նրա, կարևոր է նաև այլ միջոցների ներգրավումը, անհատ-բարերարների աջակցությունը և այլն, ինչը ևս արվում է:
Վալերի Ջաղինյանը տեղեկատվություն ներկայացրեց նաև նշված ընտանիքների բնակարանային հերթագրման գործընթացի, պահանջվող ձևաչափով տվյալների տրամադրման և ՀՀ պաշտպանության նախարարության հետ համագործակցության մասին:
Նիստի ավարտին մարզպետը շնորհակալագրեր հանձնեց հանձնաժողովի այն անդամներին, ովքեր մարզի տարածաշրջաններում պատասխանատու են իրականացվող վերոնշյալ գործընթացների համար: