Լոռու մարզպետի աշխատակազմ

Անցած տարի Տարածքային կառավարման նախարարության կողմից Լոռու մարզի 37 համայնքում իրականացված մշտադիտարկման արդյունքում արձանագրվեց, որ համայնքների ղեկավարների գերակշիռ մասը հարկերի հավաքագրման գործընթացում աշխատում է բնակչության ընդամենը 20-25 տոկոսի հետ: Իսկ ու՞ր են մնացյալ հարկատուները:
Ամեն անգամ մարզի տարբեր տարածաշրջաններում անցկացրած արտագնա փնջային խորհրդակցություններում այս հարցն է բարձրացնում մարզպետ Արթուր Նալբանդյանը: Մարզպետը նույն մտահոգությունն արտահայտեց Ալավերդիում՝ Թումանյանի տարածաշրջանի համայնքների ղեկավարների հետ հանդիպման ժամանակ: Անուն առ անուն նա թվարկեց այն համայնքները, որտեղ հարկերի հավաքագրման գործընթացում առավել ցածր է բնակչության ներգրավվածության տոկոսը:Դրանց թվում են Աքորին (24%), Շամլուղը (25%), Ալավերդին(35%), Մեծ Այրումը(43%), Թեղուտը(46%), Դսեղը և Օձունը(48%), Ճոճկանը(50%):
Մարզի ղեկավարը անհանդուրժելի համարեց հարկատուի կողմից տարիներով ապառքի կուտակումը, դա համարելով տվյալ համայնքի ղեկավարի անհետևողական, անպատասխանատու աշխատանքի հետևանք:
-Ոչ մի հարկատու արտոնյալ չէ, բոլորը պետք է իմանան, որ օրենքի պահանջների կատարումը համընդհանուր պարտականություն է, անկախ՝ անձի կարգավիճակից: Հարկատուի հետ պետք է աշխատել ամեն ամիս, այլապես՝ նա ետ է վարժվում հարկերը ժամանակին վճարելու պարտավորության զգացումից, իսկ իրավիճակը վկայում է, որ մեր համայնքների զգալի մասում այս գործելակերպն է իշխում,- շեշտեց մարզպետը, անհիմն համարելով որոշ համայնքների ղեկավարների այն պատճառաբանությունը, թե բնակչությունն անվճարունակ է:
-Դուք համոզված ե՞ք, որ լոռեցին առավել աղքատ ու անապահով է, քան Շիրակի կամ Արագածոտնի մարզերի բնակիչները, որոնք հողի հարկի վճարման ցուցանիշներով գերազանցում են մեզ,- հավաքվածներին դիմեց մարզպետը, համոզմունք հայտնելով, որ հողի հարկի գումարներն այնքան էլ ծանր չեն, և ամենամսյա մուծումների դեպքում կուտակումներ ու հետագա դժվարություններ չեն առաջանա:
Մարզպետը մեկ անգամ ևս ընդգծեց, որ հարկերի հավաքագրումը համայնքի ղեկավարի պարտադիր լիազորությունն է և այս հարցում պատճառաբանություններն ու խուսանավումները նրա օգտին չեն խոսում: Նա, ի գիտություն բոլորի, հայտարարեց, որ ՏԻ ԱԻ նախարարի հանձնարարությամբ մարզի մնացյալ համայնքներում նմանատիպ մշտադիտարկում պետք է անցկացնեն մարզպետարանները՝ համայնքների ղեկավարների աշխատանքի որակի վերաբերյալ համապատասխան եզրահանգումներով:
Խորհրդակցությանը հերթական անգամ կարևորվեց գարնան գյուղատնտեսական աշխատանքներին պատշաճ նախապատրաստվելու անհրաժեշտությունը, իսկ վաղօրոք հայտագրած օրգանական պարարտանյութերը, սերմացուն ու դիզվառելանյութը պետք է ստանալ անմնացորդ, ամբողջ քանակությամբ: