Լոռու մարզպետի աշխատակազմ

Այսուհետ մարզի ղեկավարի պահանջով տարեկան ամփոփիչ հաշվետվություններով հանդես կգան նաև մարզային ենթակայության բուժհիմնարկների ղեկավարները՝ ներկայացնելով տարվա ընթացքում կատարված աշխատանքները, անելիքներն ու խնդիրները, բուժհիմնարկների զարգացմանն ուղղված ծրագրերը:
Հունվարի 22-ի Լոռու մարզպետ Արթուր Նալբանդյանն ու մարզպետարանի առողջապահության և սոցիալական ապահովության վարչության պետ Սամվել Լամբարյանը ներկա գտնվեցին Ստեփանավանի և Տաշիրի բժշկական կենտրոնների տարեկան հաշվետվությունների ներկայացմանը, որոնց մասնակցում էին նաև բուժհիմնարկների անձնակազմերը, ԶԼՄ ներկայացուցիչներ:
Ստեփանավանի բժշկական կենտրոնի համար, ըստ տնօրեն Ռոբերտ Կոծինյանի, տարին արգասաբեր է եղել, քանի որ 2014թ. բժշկական կենտրոնում մշտական հիմունքներով աշխատանքի են ընդունվել վիրաբույժ, անեսթեզիոլոգ-ռեանիմատոլոգ, իսկ պայմանագրային հիմունքներով` պլաստիկ վիրաբույժ, էխոկարդիոգրաֆիստ, մաշկավեներաբան՝ որոշ չափով լրացնելով կադրային բացը, որն առկա է բուժհաստատությունում: Թեև 2014թ. առաջին կիսամյակում 2013թ.-ի համեմեմատությամբ աճել էր նաև վճարովի ծառայությունների թիվը, սակայն երկրորդ կիսամյակում, ըստ տնօրենի, մի շարք օբյեկտիվ և սուբյեկտիվ պատճառներով վճարովի ծառայությունների որոշակի անկում է արձանագրվել: Բժշկական կենտրոնի համար կարևոր է եղել նաև «Լոռու առողջապահական հիմնադրամի» աջակցությամբ սպիրոմետրի և բիոքիմիական անալիզատորի ձեռք բերումը: ՌԴ Ռոսպոտրեբնադզորի կողմից բժշկական կենտրոնին տրամադրվել են նաև իմունոֆերմենտատիվ անալիզների համար նախատեսված լաբորատոր կաբինետի սարքավորումներ, որոնք, սակայն, դեռևս չեն շահագործվում: Ուրախալին այն է, որ 2013թ. համեմատությամբ մանկաբարձական բաժանմունքում գրանցվել է ծննդաբերությունների թվի աճ՝ 10,1 %-ով:
Տնօրենն ի թիվս կատարված աշխատանքների և ձեռքբերումների, խոսեց նաև խնդիրներից: Նա նշեց, որ նեղ մասնագետների լուրջ կարիք է զգացվում, եղած բժիշկներն էլ աշխատում են գերծանրաբեռնված: Ռ. Կոծինյանը առաջնային համարեց հատկապես համաբուժարանային մասնաշենքի վերանորոգումը: Մարզի ղեկավարը խոստացավ հրատապ ծրագրերի առկայության դեպքում այս տարի լուծում տալ խնդրին:
Տաշիրի բժշկական կենտրոնի համար ևս, ինչպես հաշվետվության ներկայացման ընթացքում նշեց տնօրեն Վալիկո Չալաբյանը, առաջնային է բուժհիմնարկի համալրումը մասնագետ-կադրերով: Բուժհաստատությունը մի շարք նեղ մասնագետների խիստ կարիք ունի, եղած մասնագետներն էլ աշխատում են գերծանրաբեռնված գրաֆիկով: Ըստ նրա, առաջնային է բժշկական կենտրոնի պայմանների բարելավման խնդիրը: Տնօրենի հավաստմամբ, սրանք, ինչպես նաև մի շարք այլ լուրջ գործոններ են տարեցտարի վճարովի ծառայությունների նվազման պատճառ դառնում:
Ա. Նալբանդյանն, ամփոփելով ներկայացված հաշվետվությունները, անթույլատրելի համարեց հատկապես վճարովի ծառայությունների նվազեցումը, որի արդյունքում բուժհաստատությունների սպասարկման ողջ ֆինանսական բեռն ընկնում է պետության վրա: Մարզպետն առաջարկեց ծրագրեր մշակել, երիտասարդ բժիշկներին շահագրգռել, նրանց համար հարմարավետ աշխատանքային պայմաններ ստեղծել, որպեսզի ցանկություն ունենան աշխատելու տարածաշրջաններում: Այս ուղղությամբ, ի դեպ, լուրջ աշխատանքներ է իրականացնում նաև մարզպետարանը: Մարզպետը նշեց, որ նախորդ տարի Երևանի «Էրեբունի» բժշկական կենտրոնի հետ կնքված պայմանագրի համաձայն կենտրոնի լավագույն մասնագետները պատրաստակամություն են հայտնել անհարժեշտության դեպքում գալ և տեղերում վիրահատություններ կատարել, ինչը ևս կնպաստի վճարովի ծառայությունների թվի ավելացմանը: