Լոռու մարզպետի աշխատակազմ

Լոռու մարզպետ Արթուր Նալբանդյանի հանձնարարությամբ մարզի առողջապահության գլխավոր մասնագետները ուսումնասիրություններ էին կատարել մարզի բուժհիմնարկներում՝ պարզելու դրանցում տիրող իրավիճակը, բացահայտելու բացթողումներն ու թերացումները:
Նոյեմբերի 21-ին մարզի ղեկավարի, մարզպետարանի առողջապահության և սոցիալական ապահովության վարչության պետ Սամվել Լամբարյանի մասնակցությամբ կայացած քննարկում-խորհրդակցությանը նրանք ներկայացրեցին կատարված ուսումնասիրությունների արդյունքները:
Որպես բացթողում թե՛ ստացիոնար և թե՛ ամբուլատոր- համաբուժարանային բուժսպասարկում իրականացնող բուժհաստատությունների համար՝ մարզի գլխավոր գինեկոլոգը, թերապևտը, մանկաբույժը, մանկաբարձը, մանկական վիրաբույժը, սրտաբանը, ուռուցքաբանը, հոգեբույժը, նյարդաբանը, վարակաբանը, ներզատաբանը, սոնոգրաֆիստը, մաշկավեներաբանը և այլոք մատնանշեցին գրեթե միևնույն հիմնախնդիրները՝ մասնագետ-կադրերի պակասը, փաստաթղթերի կազմման առումով առաջացած խնդիրները, անհրաժեշտ չափորոշիչներին համապատասխան պայմանների, բուժսարքավորումների անբավարարությունը և այլ խնդիրներ, որոնք առավել ակնառու են տարածաշրջաններում: Ա. Նալբանդյանն ասաց, որ հայտնաբերված թերությունների մասին կիրազեկվեն մարզի բոլոր առողջապահական հիմնարկները՝ դրանք հետագայում բացառելու նպատակով: Թերությունները շտկելու համար նրանց կտրվի ժամանակ մինչև 2015թ. հունիս ամիսը, որից հետո ուսումնասիրությունների նոր փուլ կսկսվի:
-Այնտեղ, որտեղ թերությունները կկրկնվեն, խիստ մոտեցում կցուցաբերվի,- ասաց մարզի ղեկավարը:
Ս. Լամբարյանը նշեց, որ նախորդ օրը Առողջապահության նախարարությունում տեղի ունեցած խորհրդակցությանը խնդիր է համարվել այն, որ Լոռու մարզում նախորդ տարվա համեմատ նվազել են վճարովի ծառայությունները: Ստացիոնար բուժհաստատությունների ղեկավարները դա բացատրեցին հիմնականում բնակչության թվի նվազմամբ, պետական մի շարք ծրագրերի ներդրմամբ և այլ հանգամանքներով: Այսուամենայնիվ, նրանց հանձնարարվեց շտկել իրավիճակը՝ բացառելով ստվերն այս ոլորտում: Ի դեպ, մարզպետի անմիջական ջանքերով, առողջապահության ոլորտում ստվերի բացահայտման ուղղությամբ մարզում լուրջ քայլեր են ձեռնարկվում՝ սկսած 2012թ.-ից: