Լոռու մարզպետի աշխատակազմ

Սեպտեմբերի 26-ին Վանաձորի բժշկական կենտրոնի տնօրեն Վարդան Աբովյանը հրավիրել էր մամլո ասուլիս՝ իր պաշտոնավարման 100-րդ օրվա կապակցությամբ։ Մանրամասն  տեղեկատվություն տալով անցած երեքուկես ամսվա  ընթացքում կատարված աշխատանքների  մասին, տնօրենը նշեց, որ  իր  գերխնդիրը համարում է  բոլոր  հնարավորությունների օգտագործմամբ, միջոցների  ներդրմամբ ապահովել առողջապահության բարձր մակարդակ:

- Մեր նպատակն է՝  Վանաձորում ստեղծել մրցունակ բժշկական կենտրոն՝ ապահովելով որակյալ բուժծառայություն՝ ժամանակակից բժշկական սարքավորումներով և հուսալի բանիմաց բուժանձնակազմով,- ասաց Վ. Աբովյանը։

Նա տեղեկացրեց, որ անցած ժամանակահատվածում բժշկական կենտրոնը ձեռք է բերել էխոկարդիոգրաֆիայի, գաստրոսկոպիայի, սոնոգրաֆիայի, դիալիզի նոր սարքավորումներ, որոնցով հետազոտությունները մայրաքաղաքի համեմատ կատարվում են առավել մատչելի գներով։ Վերանորոգվել են մի քանի հիվանդասենյակներ։ Բժշկական կենտրոնի անձնակազմը մասնակցել է վերապատրաստման դասընթացների։ Կենտրոնն այս ընթացքում համալրվել է նոր մասնագետներով՝ մոնոգրաֆիստ, ուռուցքաբան, ծնոտային վիրաբույժ։ Ապագայում նախատեսված է աշխատանքի ընդունել կրծքային վիրաբույժի և նյարդաբանի։ Կենտրոնի բժիշկներից նյարդաբան Վրույր Ստեփանյանը վերջերս արժանացել է «Մխիթար Հերացի»  մեդալի։

Բժշկական կենտրոնում մեծ ուշադրություն է դարձվում փորձի փոխանակմանը և բժիշկների փոխօգնությանը:

- Ցանկացած զարգացման հիմքում ընկած է վստահությունը, համագործակցությունը, հետևողականությունը, թափանցիկությունը և պատասխանատվությունը, իսկ զարգացման հաջողությունը պայմանավորված է նվիրված և համառ թիմային աշխատանքով։ Փորձելու ենք առաջնորդվել այս սկզբունքներով,- ասաց Վ. Աբովյանը։

Նա պատասխանեց նաև լրագրողների տարաբնույթ հարցերին։ Մասնավորապես հիվանդանոցի նոր շենքի կառուցման հետ կապված հարցին պատասխանելով՝ նա ասաց, որ նախկինում նշված վերջնաժամկետը՝ 2016 թվականը, դեռևս ստույգ չէ և ճշտվելուց հետո այդ մասին կտեղեկացվի հանրությանը։