Տեղեկատվական կենտրոն
Նորություններ
Հերթական բարեկամական այցը Բաթումի
22.11.2013
ՀՀ Լոռու մարզի և Վրաստանի հանրապետության Աջարիայի ինքնավար մարզի համագործակցության շրջանակներում օրերս հերթական բարեկամական այցը կատարվեց Բաթումի: Լոռու մարզից Աջարիա մեկնած 30 հոգանոց պատվիրակությունը ղեկավարում էր Լոռու փոխմարզպետ Տիգրան Բադոյանը: Պատվիրակության կազմում էին նաև Լոռու մարզպետարանի կրթության, մշակույթի և սպորտի վարչության մշակույթի բաժնի պետ Արամ Ռևազյանը, Վանաձորի քաղաքապետարանի կրթության և մշակույթի բաժնի պետ Գագիկ Աղաբաբյանը, Վանաձորի Սուրբ Գր. Նարեկացի եկեղեցու հոգևոր երգչախումբը և այլոք:
Այցելության առիթը Աջարիայում հայկական համայնքի պետական գրանցման և Բաթումիում լույս տեսնող «Աղբյուր» թերթի հիմնադրման 20-ամյակի առթիվ կազմակերպված միջոցառմանը մասնակցելն էր:
Պատվիրակության անդամները նախ եղել են Բաթումիի Սուրբ Խաչ հայկական եկեղեցում, ներկա գտնվել Սուրբ պատարագի: Այստեղ հոգևոր երգերի կատարմամբ հանդես է եկել Վանաձորի Սուրբ. Գր. Նարեկացի եկեղեցու հոգևոր երգչախումբը:
Պատվիրակությունը ներկա է գտնվել նաև Բաթումի քաղաքի նորակառույց օպերայի շենքում կազմակերպված հանդիսավոր միջոցառմանը ՝ նվիրված հայկական համայնքի գրանցման և «Աղբյուր» պարբերաթերթի հիմնադրման 20-ամյակին:
Ողջույնի և շնորհավորանքի խոսքով հանդես է եկել Տ. Բադոյանը՝ կարևորելով հայ համայնքի և հայկական պարբերաթերթի մեծ դերակատարությունը Վրաստանում հայապահպանության, վիրահայության շրջանում հայկական մշակույթի և ավանդույթների ամրապնդման գործում:
Նա շնորհավորագիր է հանձնել նաև Լոռու մարզպետ Արթուր Նալբանդյանի անունից:
Սպիտակ էկրանից հնչել են նաև Արթուր Նալբանդյանի, Աջարիայի մի քանի քաղաքների հետ քույր քաղաքներ հադիսացող Վանաձորի, Սպիտակի, Ալավերդու քաղաքապետերի շնորհավորական ուղերձները: Վանաձորի քաղաքապետ Սամվել Դարբինյանի անունից հյուրընկալողներին շնորհավորանքի խոսքեր է հղել նաև Գ. Աղաբաբյանը:
Համատեղ համերգային ծրագրին մասնակցել են Վանաձորից մեկնած հոգևոր երգչախումբը, Աջարիայի հայկական համայնքի, ինչպես նաև Բաթումիի մշակութային խմբերն ու անհատ կատարողներ: Երկու մարզերի միջև համագործակցությունը կարևորել են նաև Վրաստանում Հայաստանի գլխավոր հյուպատոս Արսեն Գրիգորյանը և Աջարիայում հայկական համայնքի ղեկավար Գրիգոր Վարդանյանը: