Լոռու մարզպետի աշխատակազմ

Հոկտեմբերի 10-ին Լոռու մարզպետարանի դահլիճում տեղի ունեցավ քաղաքացիների ընդունելություն, որն անցկացրեց Լոռու փոխմարզպետ Արսեն Դարբինյանը: Քաղաքացիների հարցերին սպառիչ պատասխաններ տալու նպատակով ընդունելությանը մասնակցում էին նաև մարզպետարանի աշխատակազմի առողջապահության և սոցիալական ապահովության վարչության պետ Սամվել Լամբարյանը, Ընտանիքի,կանանց և երեխաների իրավունքների պաշտպանության բաժնի պետ Նարեկ Սարգսյանը, մարզպետի օգնականներ Արման Սարգսյանը և Տիգրան Էվինյանը:
Տարաբնույթ խնդիրներով 11 քաղաքացիներ դիմեցին ոչ միայն Վանաձորից, այլև Գուգարքի տարածաշրջանի Եղեգնուտ, Մարգահովիտ, Թումանյանի տարածաշրջանի Աքորի, Քարինջ, Ալավերդի համայնքներից:
Դրամական օգնություն ստանալու խնդրանքով, ծնողազուրկ երեխաներին մանակատանը տեղավորելու, ճանապարհների վերանորոգման, ջրամատակարարման, կենցաղային խնդիրներով, աշխատանքի տեղավորման հարցերով դիմեցին 1-ական, անվճար բուժօգնության հնարավորությունից օգտվելու խնդրանքով՝ 3, բնակարանային պայմանների բարելավման հարցով՝ 2 քաղաքացիներ: Բավարարվեցին դրամական օգնության, երեխաներին մանակատանը տեղավորման խնդրանքները: Առողջապահական հարցերով դիմած քաղաքացիների խնդրանքը կբավարարվի լրացուցիչ ուսումնասիրություններ կատարելուց և անվճար բուժման հնարավորությունները դիտարկելուց հետո: Մյուս խնդիրներով դիմած բնակիչներն ուղղորդվեցին համապատասխան համայնքային ենթակայության կառույցներ: