Տեղեկատվական կենտրոն
Նորություններ
Պետական հոգածությունը շարունակական կլինի
26.08.2013
Օգոստոսի 26-ին Լոռու մարզպետի հերթական աշխատանքային խորհրդակցության օրն էր: Քննարկման առարկան օգոստոսի 30-ին մարզխորհրդի նիստում քննարկվելիք հարցերի ճշգրտումն էր, մարզի համայնքներում սեփական եկամուտների հավաքագրման, բերքահավաքի ու գյուղմթերքների իրացման իրավաիճակի,կրթական, քաղաքաշինական և այլ հարցեր:
Մարզպետ Ա. Նալբանդյանը այս անգամ էլ իր դժգոհությունն արտահայտելով սեփական եկամուտների հավաքագրման ցուցանիշներից, ևս մեկ անգամ ընդգծեց, որ մարզպետի տեղակալները, գործին առնչվող ստորաբաժանումների պետերը պետք է առավել հաճախ լինեն հատկապես թերացող համայնքներում, առավել հետևողական լինեն հարկերի հավաքագրման ու մուտքագրման հարցում, հնարավորիս բացառելով կամայականությունների դրսևորումը:
Ի դեպ, անդրադառնալով օրեր առաջ գյուղնախարար Սերգո Կարապետյանի Լոռու մարզ կատարած այցին, մարզպետը նշեց, որ նախարարը բավականին տպավորված է եղել գյուղատնտեսական մշակաբույսերի, հատկապես հացահատիկի ու կարտոֆիլի աննախադեպ բարձր բերքի առկայությամբ: Մարզպետը հայտարարեց, որ այս տարի ևս մարզի երկրագործները կզգան պետության ամենագործնական աջակցությունը ինչպես սերմացուների, այնպես էլ դիզվառելանյութի, պարարտանյութի ու գյուղտեխնիկայի մատչելի գներով ձեռքբերման, բերքի իրացման հարցում:
-Պետությունը պատրաստ է շուկայականից մոտ 30 տոկոս զեղչով գյուղտեխնիկա տրամադրել ինչպես կոլեկտիվ տնտեսություններին, այնպես էլ անհատ ֆերմերներին: Լավագույն հնարավորություններ են ընձեռնված արդեն իրենց դարն ապրած մեքենատրակտորային ռեսուրսները թարմացնելու համար և պետք է օգտվել այդ առիթից,-ասաց մարզպետը:
Բերքահավաքի ընթացքի վերաբերյալ ամփոփ տեղեկատվություն տվեց գյուղատնտեսության ու բնապահպանության վարչության պետ Գ. Հակոբյանը:
Ապա Ա. Նալբանդյանն իր մտահոգությունն արտահայտեց կրթության և առողջապահության ոլորտում առկա չարդարացված ֆինանսատնտեսական գործառույթների վերաբերյալ:
-Բժիշկն ու մանկավարժը իրենց աշխատանքի համար պետք է համարժեք և արժանավայել վարձատրություն ստանան, այլապես նրանց մեջ մարում է եռանդն ու նվիրվածությունը աշխատանքի նկատմամբ, իսկ եղած առանց այն էլ սուղ հնարավորությունների պարագայում մենք դա պետք է իրականացնենք որոշակի ոչ առաջնային կարևորության ֆինանսատնտեսական գործառույթների կրճատման հաշվին,-ասաց մարզպետը՝ կրթության, մշակույթի և սպորտի, առողջապահության և սոցիալական ապահովության վարչությունների պետերին հանձնարարելով ուսումնասիրել իրավիճակը և առաջարկություններ ներկայացնել խնդրի վերաբերյալ:
Քաղաքաշինական գործերի մասին տեղեկատվություն հաղորդեց քաղաքաշինության վարչության պետ Ա.Ջանազյանը, նշելով, որ պետբյուջեի ծրագրերով իրականացվող վերջին փուլի շինաշխատանքների գերակշիռ մասը, աննշան բացառություններով, ավարտված է: Վարչության պետը մարզպետին նաև զեկուցեց, որ օրերս Ահնիձորի վերականորոգված դպրոցում նկատված որոշակի թերությունները շտկվում են շինարարներ կողմից:
Խորհրդակցության ավարտին մարզպետ Ա. Նալբանդյանը վարչությունների ու բաժինների պետերին հանձնարարեց Գիտելիքի օրը լինել դպրոցներում և նոր ուսումնական տարվա առիթով քաջալերել մանկավարժներին ու սովորողներին: