Լոռու մարզպետի աշխատակազմ

Վանաձորի «Հայաստան» ՄՀԿ մարզադպրոցի մարզասրահում կայացավ ազատ ոճի ըմբշամարտի օլիմպիական խաղերի արծաթե մեդալակիր, աշխարհի եռակի գավաթակիր Ստեփան Սարգսյանի մրցանակների խաղարկության 18-րդ միջազգային մրցաշարը։ Մասնակցելու նպատակով մարզկենտրոն էին ժամանել ԱՄՆ-ի, Ռուսաստանի, Ուկրաինայի, Իրանի, Բելառուսի, Ղրղըզստանի և Վրաստանի ուժեղագույն ըմբիշները, ինչպես նաև մարզիկներ հանրապետության տարբեր քաղաքներից։ Մրցաշարի բացման հանդիսավոր արարողությանը ներկա էին ՀԱՕԿ-ի փոխնախագահ Դերենիկ Գաբրիելյանը, Ստեփան Սարգսյանը, անվանի այլ մարզաշխատողներ։ Լոռու փոխմարզպետ Արսեն Դարբինյանը մարզպետի անունից հուշանվերներ հանձնեց վանաձորցի մարզիկներ Տիգրան Կիրակոսյանին, Շամիր Աթյանին և Արեն Ալեքյանին, նրանց մարզիչներին՝ մարզի մարզական պատիվը բարձր պահելու և միջազգային մրցասպարեզներում հաջող մրցելույթների համար։ Մրցաշարն անցավ հետաքրքիր և դիտարժան պայքարում։ Վանաձորցի մարզիկներից 55 և 66 կգ քաշային կարգերում բրոնզե մեդալների արժանացան Օհան Գիքինյանը և Նարեկ Սիրունյանը։ Վանաձորցի մրցանակակիրներին Վանաձորի քաղաքապետարանի ֆիզկուլտուրայի և սպորտի բաժնի պետ Գևորգ Մացակյանը քաղաքապետարանի կողմից հուշանվերներ հանձնեց։ Մարզիչներ Արամ Խանզադյանի և Ժորա Հովհաննիսյանի սաները, ինչպես նաև քաշային տարբեր կարգերի հաղթողներն ու մրցանակակիրները Ստ. Սարգսյանի կողմից արժանացան պատվոգրերի, հուշանվերների և դրամական պարգևների։