Լոռու մարզպետի աշխատակազմ

Մարզպետ Արթուր Նալբանդյանը փոխմարզպետ Տիգրան Բադոյանի, Քաղաքաշինության վարչության պետ Արմեն Ջանազյանի, ՏԻՄ վարչության պետ Դավիթ Մանուչարյանի ուղեկցությամբ աշխատանքային հերթական այցով Տաշիրի տարածաշրջանում էր:
Տաշիրի քաղաքապետարանում քաղաքացիների ընդունելություն էր կազմակերպվել: Տարաբնույթ խնդիրներով մարզի ղեկավարին դիմեցին Տաշիրից և հարակից համայնքներից շուրջ մեկ տասնյակ բնակիչներ: Արծարծվեցին հիմնականում ջրագծերի, մսամթերքի, կաթնամթերքի իրացման, գյուղամիջյան ճանապարհների հետ կապված հարցեր, որոնց տրվեցին սպառիչ պատասխաններ:
Նույն օրը մարզի ղեկավարը եղավ Տաշիրի տարածաշրջանի Դաշտադեմ համայնքում: Գյուղում շուրջ 20 տարի որևէ ծրագիր չի իրականացվել: Համայնքում բազմաթիվ խնդիրներ կան, 10 աշակերտ ունեցող դպրոցը վթարային շենքում է, մանկապարտեզ չի գործում, գյուղապետարանի շենքն անբարեկարգ է: 130 բնակիչ ունեցող սահմանամերձ գյուղում հիմնական զբաղմունքն անասնապահությունն է: Համայնքի ղեկավար Մարինե Խռոյանը՝ որպես գյուղապետարան, առանձնացրել է սեփական տան մեկ սենյակը: Նույնատիպ խնդիրներն կան նաև Պաղաղբյուր համայնքում: Բնակիչների դժգոհության հիմնական պատճառը գյուղամիջյան և համայնք տանող ճանապարհներն են:
140 բնակիչ ունեցող հարևան Ձյունաշող համայնքը ևս զերծ չէ խնդիրներից, սակայն այստեղ կարևոր ծրագիր է իրականացվել պետական աջակցությամբ: Պետբյուջեից 14 միլիոն դրամ է ներդրվել նախկին ակումբի կիսաքանդ շենքը բարեկարգ դարձնելու համար, որը կծառայի իբրև համայնքային կետրոն: Այստեղ կտեղակայվեն գյուղապետարանը, բուժկետը, հանդիսությունների սրահը, նույն հարկի տակ կգործի նաև փոստային ծառայությունը: Մարզի ղեկավարը մասնակցեց համայքնային կենտրոնի բացման արարողությանը: