Տեղեկատվական կենտրոն
Նորություններ
Երեխաների պաշտպանության օրը՝ հագեցած ծրագրով
02.06.2013
Երեխաների պաշտպանության միջազգային օրվա կապակցությամբ Լոռու մարզպետ Արթուր Նալբանդյանի նախաձեռնած հաճելի ավանդույթով հունիսի 1-ին մարզպետարանի պատվիրակությունն այցելեց Վանաձորի մանկատուն, երեխաների խնդիրներով զբաղվող հաստատություններ, կազմակերություններ՝ անակնկալներ մատուցելով երեխաներին:
Վանաձորի մանկատանը մարզի ղեկավարը սպասված հյուր էր: Դեռևս Ալավերդու քաղաքապետ եղած տարիներին Ա.Նալբանդյանն այցելում էր մանկատուն, աջակցություն ցուցաբերում հաստատության սաներին: Այսօր էլ ավանդույթը շարունակվում է և յուրաքանչյուր տարի, ինչպես և այս անգամ, Վանաձորի մանկատան սաների տոնը շնորհավորելու էին եկել նաև Ալավերդու քաղաքապետարանի ներկայացուցիչները:
Մարզի ղեկավարին ուղեկցում էին փոխմարզպետ Տիգրան Բադոյանը, մարզպետարանի ընտանիքի, կանանց, և երեխաների իրավունքների պաշտպանության բաժնի պետ Նարեկ Սարգսյանը: Մանկատան սաների մասնակցությամբ գեղարվեստական միջոցառում էր կազմակերպվել մանկատան բակում, իսկ ավելի փոքրիկները մասնակցում էին կավճանկարների մրցույթին: Ա. Նալբանդյանն ջերմորեն շնորհավորեց երեխաներին` մաղթելով անհոգ մանկություն.
Մարզի ղեկավարը հերթական անգամ շրջեց մանկատան մասնաշենքում: Տնօրեն Արշալույս Հարությունյանի ներկայացմամբ հաստատությունում կգործի սոցիալական մանկավարժի ու հոգեբանի կաբինետ, որը, սակայն, առայժմ կահավորված չէ: Մարզպետը խոստացավ աջակցել այդ հարցում: Նրա հովանավորությամբ նաև հյուրասիրություն էր նախապատրասվել մանկատան փոքրիկ բնակիչների համար:
Մարզի ղեկավարին սպասում էին նաև Վանաձորի թիվ 15 մանկապարտեզում: Մանուկների ուրախ երգն ու պարը ոգևորություն պարգևեց Ա. Նալբանդյանին, Տ. Բադոյանին, մարզպետարանի կրթության, մշակույթի և սպորտի վարչության պետ Մինաս Սայադյանին:
Հաջորդ այցելությունը «Հայկական Կարիտասի» «Փոքրիկ Իշխան» կենտրոն էր: Այստեղ նույնպես մարզպետը ձեռնունայն չէր եկել, կազմակերպությանը տեխնիկա նվիրեց, ծանոթացավ իրականացվող ծրագրերին: Կենտրոնի համակարգող Նարինե Ղազարյանի տեղեկացմամբ` կազմակերպություն են հաճախում սոցիալապես անապահով ընտանիքների երեխաներ 10-18 տարիքային խմբերից: Երեխաներն, ինչպես նաև նրանց ծնողներն այստեղ մասնագիտական կրթություն և սոցիալ-հոգեբանական աջակցություն են ստանում: Ծրագրերի կրթական մասը «Հայկական Կարիտասի» ֆինանսավորմամբ իրականացնում է «Խաչվող ուղիներ» հասարակական կազմակերպությունը:
Օրվա երկրորդ կեսին մարզպետարանի դահլիճում հանդիպում էր կազմակերպվել մարզկենտրոնում ակտիվ գործունեություն ծավալող, երեխաների հիմնախնդիրներով զբաղվող հասարակական կազմակերպությունների ղեկավարների, ոստիկանության բաժինների անչափահասների գործերով տեսուչների մասնակցությամբ: Ա. Նալբանդյանն իր ողջույնի խոսքում կարևորեց նրանց դերը երեխաների խնդիրների բացահայտման, դրանց լուծման գործում:
Մարզի ղեկավարը շնորհակալագրերով պարգևատրեց «Առավոտ», «Հայկական Կարիտասի» «Փոքրիկ Իշխան» կենտրոնի, «Խաչվող ուղիներ», «Օրրան» հկ-ներին Ամերիկայի Հայ ավետարանչական ընկերակցության Հայաստանի մասնաճյուղի Վանաձորի «Շող» ցերեկային կենտրոնին` կյանքի դժվարին պայմաններում հայտված երեխաների վերականգնման ու զարգացման գործում ունեցած մեծ ավանդի համար, Ոստիկանության Լոռու մարզային վարչության անչափահասների գործերով զբաղվող մի խումբ տեսուչների ու բաժնի պետերի:
Մարզպետը նույն օրը մարզպետարանի ընտանիքի, կանանց և երեխաների իրավունքների պաշտպանության բաժնի աշխատակիցների, փոխմարզպետ Արսեն Դարբինայնի, Մ. Սայադյանի ուղեկցությամբ եղավ նաև Մարգահովիտ համայնքում բնակվող Լիզա Գևորգյանի խնամատար ընտանիքում: Այն մարզում ընտրված 5 խնամատար ընտանիքներից մեկն է, որտեղ դաստիարակվում ու ծնողական ջերմ վերաաբերմունքի են արժանանում մանկատան երեխաները: Այստեղ 9-ամյա Արմեն Խաչատրյանը բնակվում է 2007 թվականից: «Ծնողների» ջանքերի, հետևողական աշխատանքի շնորհիվ Արմենը դպրոցում բացառիկ առաջադիմություն է ցուցաբերում: Նա սրտատրոփ սպասում էր մարզի ղեկավարի այցին, որպեսզի պատմի իր հաջողությունների մասին: Ա. Նալբանդյանը վստահեցրեց, որ մարզային իշխանությունները պատրաստակամ են նմանատիպ ընտանիքներին աջակցել ցանկացած հարցում: Նա Արմենին նույնպես անակնկալ մատուցեց` նվիրելով հեծանիվ, իսկ ընտանիքին ցուցաբերեց դրամական աջակցություն: