Տեղեկատվական կենտրոն
Նորություններ
Մարզպետ Արթուր Նալբանդյանն աշխատանքային այցով Տաշիրի տարածաշրջանում էր
23.05.2013
Լոռու մարզպետ Արթուր Նալբանդյանը մայիսի 21-ին աշխատանքային այցով եղավ Տաշիրի տարածաշրջանի մի շարք համայնքներում: Այցերը մշտապես օգնում են տեղում ծանոթանալ համայնքային խնդիրներին, առանձնացնել դրանք ըստ առաջնահերթության՝ հետագա ծրագրերում ներառելու նպատակով:
Ա. Նալբանդյանը եղավ Տաշիրի տարածաշրջանի այն համայնքներում, որտեղ պետբյուջեի միջոցներով ծրագրեր են իրականացվում, կամ նախատեսվում են առաջիկայում:
Առաջին կանգառը Միխայլովկա համայնք էր, որի դպրոցում մասնակի վերանորոգման աշխատանքներ են ընթանում: Ծրագրի արժողությունը 18 միլիոն դրամ է: Այստեղ նորացվել է սանհանգույցը, փոխվել են դռներն ու պատուհանները:
Մանկավարժները մարզի ղեկավարին խնդրեցին հնարավորության դեպքում դպրոցն ապահովել լոկալ ջեռուցմամբ: Ա. Նալբանդյանն ի պատասխան առաջարկեց հաշվարկ կատարել, հաշվի առնել նպատակահարմարությունը ՝ հատկապես գազի սակագնի հնարավոր թանկացման դեպքում: Եթե դպրոցի ֆինանսական հնարավորությունները թույլ տան վճարելու ամենամսյա վարձավճարները ծախսվելիք գազի դիմաց , ապա մարզպետարանը պատրաստ է ընդառաջ գնալ նաև այս խնդրի լուծմանը: Պետրովկայում պետբյուջեից 20 միլիոն է տրամադրվել՝ գյուղը գազիֆիկացնելու համար, առայժմ՝ մասամբ: Օրեր անց աշխատանքները կավարտվեն, սակայն ինչպես Ա. Նալբանդյանն է վստահեցնում, չի բացառվում, որ համայնքի մյուս հատվածում գազիֆիկացման աշխատանքներ տարվեն 5-րդ հրատապ ծրագրի շրջանակներում:
Ապավեն համայնքում մարզպետն առաջին անգամ էր լինում: Ապավենը մարզի այն համայնքներից է, որտեղ առկա են բազմաթիվ խնդիրներ: Այն ընդամենը մի քանի տասնյակ բնակիչ ունի: Ճանապարհներն անբարեկարգ են: Գյուղում դպրոց չի գործում: Ապավենցի փոքրիկները դպրոց են հաճախում հարևան Արծնի գյուղում, սակայն տրանսպորտի բացակայությունը լուրջ խնդիր է , հատկապես ձռման ամիսներին: Արծնի տանող ճանապարհները նույնպես վերանորոգման կարիք ունեն:
Մարզի ղեկավարը զրուցեց նաև բնակիչների հետ՝ հաղորդակից դառնալով նրանց հուզող հարցերին: Բնակիչները դժգոհում էին հիմնականում կաթի ցածր ինքնարժեքից, մթերման ու ստացած բերքի իրացման հետ կապված խնդիրներից:
Ա. Նալբանդյանը Սարչապետ համայնքում ծանոթացավ նորակառույց մանկապարտեզի առօրյային: Նախորդ տարի աշխատանքային այցի ժամանակ Սարչապետի համայնքապետը նախակրթարանի հարց էր բարձրացրել: Ընդամենը մեկ տարի է անցել, իսկ մանկապարտեզն արդեն լիարժեք գործում է: Մարզի ղեկավարը մեկ անգամ չէ, որ կարևորել է նախակրթարանների դերը հատկապես գյուղական համայքներում: Սարչապետում նախակրթարանի հիմնումն այն ծրագրերից է, որի միջոցով համատեղվել են պետական, համայնքային և միջազգային կազմակերպությունների միջոցները : Արդյունքում այսօր հարմարավետ պայմաններում 4-5 տարեկանների խմբում նախադպրոցական կրթություն է ստանում շուրջ 30 երեխա: